Ormýz buǵazyn birneshe kún ishinde ashý qajet: Tramp NATO-ǵa talap qoıdy
ASTANA. KAZINFORM – AQSh prezıdenti Donald Tramp NATO elderinen Ormýz buǵazyndaǵy daǵdarysty rettep, ony jaqyn kúnderi qaıta ashý boıynsha naqty sheshim qabyldaýdy talap etti, dep habarlaıdy Euronews.
Málimetke sáıkes, bul talap Mark Rıýtte men Tramp arasyndaǵy Vashıngtondaǵy kezdesýden keıin alıansqa múshe elderge jetkizilgen.
AQSh basshysy buǵazdy ashý boıynsha jospar «apta emes, birneshe kún ishinde» daıyndalýy tıis ekenin atap ótken. Ol odaqtastardyń bul máselege qatysty áreketsizdigine narazylyq bildirgen.
Sarapshylardyń pikirinshe, buǵazdy qaıta ashý operatsııasy aımaqta áskerı kemeler men jeke quramdy ornalastyrýdy talap etýi múmkin. Alaıda Eýropanyń birqatar elderi bastapqyda mundaı qadamǵa barýǵa qulyqsyz bolǵan.
Kezdesý qorytyndysy boıynsha Rıýtte Tramptyń bul máselege «aıtarlyqtaı kóńili tolmaıtynyn» jetkizdi.
NATO ókilderi AQSh-tyń Ormýz buǵazynda erkin keme qatynasyn qamtamasyz etý úshin naqty mindettemeler men áreketter kútetinin rastady.
Aıta keteıik, ótken aptada 40-tan astam el buǵaz arqyly erkin ótýdi qamtamasyz etýge baǵyttalǵan koalıtsııaǵa qosylǵan. Bul aımaq álemdik energııa tasymaly úshin strategııalyq mańyzǵa ıe.
Qazirgi ýaqytta NATO elderi buǵazdy tıimdi ári qaýipsiz jolmen qaıta ashý máselesin jedel talqylap jatyr.
