Ormýz buǵazy: Japonııa kemelerden qosymsha aqy almaýdy talap etti
ASTANA. KAZINFORM – Japonııa premer-mınıstri Sanae Takaıchı Iran prezıdenti Masýd Pezeshkıanmen telefon arqyly sóılesip, Ormýz buǵazy arqyly kemelerdiń ótýine qosymsha aqy salynbaýy kerek ekenin málimdedi. Bul týraly Kyodo News jazdy.
Tokıoda jýrnalısterge suhbat bergen Takaıchı AQSh pen Irannyń kelissóz júrgizip, ásirese ıadrolyq máseleler boıynsha múmkindiginshe tezirek kelisimge kelýi qajet ekenin Pezeshkıanǵa jetkizgenin aıtty.
– Ormýz buǵazynda qosymsha aqysyz erkin ári qaýipsiz keme qatynasyn múmkindiginshe tezirek qalpyna keltirý mańyzdy, – dedi Japonııa premer-mınıstri.
Tabıǵı resýrstary shekteýli Japonııa shıki munaı ımporty boıynsha Taıaý Shyǵys elderine aıtarlyqtaı táýeldi.
Shamamen 20 mınýtqa sozylǵan áńgime barysynda Pezeshkıan Irannyń ustanymyn, sonyń ishinde Ormýz buǵazy boıynsha Omanmen júrgizilip jatqan kelissózderdiń qazirgi jaǵdaıy men bolashaǵyn túsindirgen. Takaıchı dúısenbi kúni Oman sultany Haısam ben Tarık Ál Saıdpen de sóılesken.
Japonııa premer-mınıstri Arab túbeginiń ońtústik-batysyndaǵy Bab-el-Mandeb buǵazyndaǵy jaǵdaıǵa energetıkalyq qaýipsizdik turǵysynan «qatty alańdaıtynyn» jetkizdi. Ol Irandy Iemendegi Tegeran qoldaıtyn hýsıtterdi ustamdylyq tanytýǵa shaqyrýǵa úndedi.
Iemen bıliginiń málimetinshe, shildede Saýd Arabııasynyń kemelerine qarsy «teńiz blokadasyn» jarııalaǵan hýsıtter seısenbi kúni Bab-el-Mandeb buǵazynda júk kemesine shabýyl jasaǵan. Ormýz buǵazy is júzinde jabylǵannan keıin bul baǵyt munaı tasymaldaýdyń balama joldarynyń birine aınalǵan.
Takaıchıdiń aıtýynsha, Pezeshkıan Irannyń Saýd Arabııasymen dıalog júrgize otyryp, máseleni sheshýge kúsh salyp jatqanyn málimdegen.
Japonııa premer-mınıstri Iranda ustalyp, sáýir aıynda kepilmen bosatylǵan japon azamatyna qatysty máseleni de tez arada sheshýge shaqyrdy. Ol Japonııanyń NHK qoǵamdyq teleradıokompanııasynyń Tegerandaǵy bıýro basshysy bolýy múmkin.
Takaıchı men Pezeshkıan maýsymnan beri alǵash ret sóılesti. Aqpan aıynyń sońynda AQSh pen Izraıldiń Iranǵa qarsy soǵysy bastalǵaly bul olardyń tórtinshi kelissózi. Japonııa AQSh-tyń jaqyn odaqtasy bolǵanymen, Iranmen dástúrli túrde dostyq qarym-qatynas ornatyp kelgen.
Aıta keteıik, buǵan deıin Iran men Oman Ormýz buǵazy boıynsha kelisimge kelýge jaqyndaǵanyn jazdyq.
Sondaı-aq Ormýz buǵazy mańynda eki munaı tankerine shabýyl jasaldy.
