Ormýz buǵazy tóńiregindegi daý: Tramp NATO elderin «qorqaq» dep atady
ASTANA. KAZINFORM – AQSh prezıdenti Donald Tramp Ormýz buǵazyndaǵy jaǵdaıǵa baılanysty NATO elderin «qorqaqtar» dep atady, dep habarlaıdy DW.
Tramp Truth Social áleýmettik jelisinde jarııalaǵan jazbasynda alıans elderi munaı baǵasynyń qymbattaýyna shaǵymdanatynyn, biraq Ormýz buǵazyn ashýǵa kómekteskisi kelmeıtinin aıtty. Onyń sózinshe, bul «táýekeli az, qarapaıym áskerı qadam» bolýy múmkin.
«Qorqaqtar», – dep jazdy AQSh prezıdenti bas áriptermen.
Ol sondaı-aq mundaı áreketti AQSh umytpaıtynyn aıtyp, Amerıkasyz NATO «qaǵazdaǵy jolbarys» ǵana ekenin málimdedi.
Tramp odaqtastardan Arab túbegi men Iran arasyndaǵy mańyzdy teńiz joly – Ormýz buǵazy arqyly keme qatynasyn qamtamasyz etý úshin áskerı qoldaý kórsetýdi talap etken. Alaıda Germanııa men birqatar elder bul usynystan bas tartqan.
Osydan keıin Aq úı basshysy NATO-nyń sheshimin «óte úlken qatelik» dep atap, Germanııa men basqa memleketterdiń ustanymyn «tańǵalarlyq» dep baǵalady. Sonymen qatar ol AQSh odaqtastardyń kómegine muqtaj emes ekenin de aıtty.
Germanııa qorǵanys mınıstrliginiń ókili DW saýalyna jaýap bere otyryp, Berlın odaqtastarmen Taıaý Shyǵystaǵy qaýipsizdik jaǵdaıy boıynsha turaqty konsýltatsııalar júrgizip jatqanyn jetkizdi.
Sonymen birge Germanııa óńirge qosymsha ásker jiberýdi josparlamaıtynyn, tek burynnan qatysyp otyrǵan mıssııalar – OIR, UNIFIL, ASPIDES jáne NMI sheńberinde jumys jalǵasatynyn málimdedi.
AQSh pen Izraıldiń Iranǵa qarsy soǵysy bastalǵan 28 aqpannan beri álemdegi munaı men suıytylǵan gaz tasymalynyń shamamen besten biri ótetin Ormýz buǵazy is júzinde jabyq kúıde qalyp otyr. Iran áskeri Parsy shyǵanaǵyndaǵy birqatar munaı nysandaryna jáne tankerlerge soqqy jasap, bul jaǵdaı álemdik munaı men gaz baǵasynyń kúrt ósýine áser etti.
Baǵanyń qymbattaýy AQSh ishinde de saıası qysymdy kúsheıtip otyr. Sarapshylardyń pikirinshe, janarmaı baǵasynyń ósýi Donald Tramp ákimshiligi úshin negizgi ishki saıası máselelerdiń birine aınalǵan.
Aıta keteıik, AQSh Ormýz buǵazy men Hark aralyn baqylaýǵa alý úshin qurlyq áskerin kúsheıtpek.
