Ormýz buǵazy arqyly Oman baǵytymen keme qatynasy kúrt azaıdy
ASTANA. KAZINFORM — Oman jaǵalaýy boıymen ótetin Ormýz buǵazy arqyly keme qozǵalysy birneshe kemeniń baǵytyn ózgertkennen keıin eń tómengi deńgeıge deıin azaıdy, dep habarlaıdy TASS.
Bloomberg agenttiginiń málimetinshe, 3–4 shilde kúnderi Oman baǵytymen Ormýz buǵazy arqyly ótken keminde segiz keme kútpegen jerden keri burylǵan. Onyń tórteýi keıin baǵytyn ózgertip, Iran jaǵalaýy boıymen júrýdi tańdaǵan.
Baǵytyn ózgertken kemelerdiń qatarynda munaı tankerleri, qurǵaq júk tasymaldaıtyn kemeler jáne avtotasymaldaýshylar bolǵan.
Kpler saraptamalyq kompanııasynyń deregine sáıkes, 4 shildede Ormýz buǵazynan eki baǵytta barlyǵy 19 keme ótken. Alaıda olardyń tek bireýi ǵana Oman baǵytymen júrgenin ashyq málimdegen. Al 3 shildede bul baǵytpen 13 keme júrgen.
Oqıǵaǵa qatysty resmı túsinikteme ázirge jarııalanǵan joq.
Buǵan deıin Tegeran Ormýz buǵazy arqyly ótý erejeleri buzylǵan jaǵdaıda «qatań jaýap» beriletinin eskertken.
Aıta ketelik Ormýz buǵazy arqyly táýligine 10 mıllıon barrelge deıin munaı tasymaldanady.
