Ormýz buǵazy arqyly kemelerdiń ótýi dál qazir múmkin emes – Iran bıligi
ASTANA. KAZINFORM – Irannyń Parsy shyǵanaǵyn baqylaý basqarmasy AQSh qarýly kúshteriniń óńirdegi sońǵy «zańsyz áreketterine» baılanysty Ormýz buǵazy arqyly kemelerdiń ótýi ázirge múmkin emes ekenin málimdedi. Bul týraly Sınhýa agenttigi jazdy.
Vedomstvo X áleýmettik jelisinde jarııalaǵan habarlamada óńirdegi jaǵdaı turaqtalyp, qaýipsizdik tolyq qalpyna kelgennen keıin Ormýz buǵazy arqyly ótýge berilgen barlyq ótinim belgilengen tártippen qaralyp, qajetti ruqsattar beriletini aıtylǵan.
Basqarma Ormýz buǵazy arqyly ótýge ruqsat tek PGSA.ir resmı saıty arqyly rásimdeletinin de atap ótti.
Buǵan deıin AQSh Qarýly kúshteriniń Ortalyq qolbasshylyǵy (CENTCOM) X áleýmettik jelisinde amerıkalyq áskerıler osy aptada Iranǵa qarsy úshinshi márte soqqy jasaǵanyn habarlaǵan bolatyn. AQSh tarapy bul áreketti Ormýz buǵazynda ırandyq kúshterdiń taǵy bir saýda kemesine jasaǵan shabýylyna jaýap dep túsindirdi.
Jeksenbige qaraǵan túni Irannyń Islam revolıýtsııasy saqshylar korpýsynyń (KSIR) áskerı-teńiz kúshteri Ormýz buǵazynda «tártip buzǵan kemeni» toqtatqanyn málimdedi. Onda keme navıgatsııalyq júıesin óshirgeni, al ony toqtatar aldynda eskertý retinde oq atylǵany aıtylǵan.
Keıin KSIR AQSh-tyń óńirdegi áskerı bazalaryna jaýap soqqylary barysynda Ormýz buǵazynda taǵy bir «tártip buzǵan keme» toqtatylǵanyn habarlady.
Eske sala ketsek, AQSh Ormýz buǵazy mańyndaǵy Iran nysandaryna taǵy da soqqy jasady.
Al BUU basshysy Iran men AQSh-ty kelissózdi shuǵyl qaıta bastaýǵa shaqyrdy.
