Ormýz buǵazy arqyly keme qatynasy 90% qysqardy

ASTANA. KAZINFORM — Parsy shyǵanaǵy aımaǵynda qarýly qaqtyǵys bastalǵannan beri Ormýz buǵazy arqyly ótetin munaı tankerleriniń sany 90% azaıdy. Bul týraly Bahreın Syrtqy ister mınıstri Abdel Latıf ben Rashed áz-Zaıanı málimdedi, dep habarlaıdy Report.

— Bıylǵy jyldyń 28 aqpanynan bastap Ormýz buǵazy arqyly tankerler tasymaly 90%-dan astamǵa qysqardy, — dedi mınıstr. 

Onyń aıtýynsha, Ormýz buǵazyndaǵy jaǵdaı halyqaralyq quqyq pen jahandyq azyq-túlik qaýipsizdigine qaýip tóndiredi. 

— Ormýz buǵazyndaǵy daǵdarysty sheshýde ýaqyt óte mańyzdy jáne ony sheshý halyqaralyq qaýymdastyqtyń shuǵyl áreketin talap etedi, — dedi áz-Zaıanı.

Iran basshylyǵy AQSh, Izraıl jáne operatsııany qoldaǵan basqa elderdiń kemeleri úshin Ormýz buǵazyn jabý týraly sheshim qabyldady. Qaqtyǵys kezinde birneshe tanker Tegerannyń ruqsatynsyz buǵazdan ótpek bolǵan kezde shabýylǵa ushyrady.

Eske sala keteıik, 28 aqpanda AQSh pen Izraıl Iranǵa qarsy áskerı operatsııa bastady. Irannyń iri qalalary, sonyń ishinde Tegeran da soqqyǵa jyǵyldy. Sonymen birge AQSh Iran halqyn óz úkimetine qarsy kóterilip, bılikti basyp alýǵa ashyq túrde shaqyrdy. Soqqylardan Irannyń rýhanı kósemi aıatolla Álı Hameneı men Islam respýblıkasy basshylyǵyndaǵy taǵy birneshe mańyzdy tulǵalar qaza tapty. Iran Bahreın, Iordanııa, Katar, Kýveıt, BAÁ jáne Saýd Arabııasyndaǵy Izraıl men AQSh nysandaryna qarsy jaýap operatsııalaryn bastady.