Ormanshylarǵa 9,8 mlrd teńgeniń tehnıkasy men jabdyǵy satyp alynady

NUR-SULTAN. QazAqparat – QR Premer-Mınıstri Álıhan Smaıylov Májilis depýtatynyń saýalyna joldaǵan jaýabynda ormanshylarǵa lızıng arqyly 9,8 mlrd teńgeniń tehnıkasy men jabdyǵy satyp alynatynyn málim etti, dep habarlaıdy QazAqparat tilshisi.

«Memleket basshysynyń orman qoryna 5 jyl ishinde 2 mıllıard, eldi mekenderde 15 mıllıon túp aǵash otyrǵyzý týraly tapsyrmasyn iske asyrý maqsatymen memlekettik orman ıelenýshilerdiń materıaldyq-tehnıkalyq bazasyn nyǵaıtý boıynsha jumystar júrgizilip jatyr. Ekologııa, geologııa jáne tabıǵı resýrstar mınıstrliginiń Tabıǵat qorǵaý jáne orman qorǵaý mekemelerin, oblys ákimdikterin materıaldyq-tehnıkalyq jaraqtandyrýdy jaqsartý úshin 2021 jyly 3,174 mlrd teńge bólindi. Olarǵa patrýldik avtomobılder, órt sóndirý tehnıkasy, traktorlar, mototsıklder men tirkeme jabdyqtar satyp alyndy», - dep jazylǵan Úkimet basshysynyń jaýabynda.

Onyń aıtýynsha, orman alqaptaryn qalpyna keltirý jáne aǵash egý jónindegi 2021-2025 jyldarǵa arnalǵan keshendi jospar aıasynda tabıǵat pen orman qorǵaý mekemelerin arnaıy tehnıkamen jabdyqtaýǵa shamamen 16,033 mlrd teńge qarastyrylǵan.

«Oǵan qosa búgingi tańda tabıǵat qorǵaıtyn jáne orman kúzetindegi mekemelerdiń materıaldyq-tehnıkalyq jaǵdaıyn jaqsartý isin lızıng arqyly sheshý máselesi pysyqtalýda. Qarjylandyrýdyń bul túrimen 9,812 mlrd teńgege 1034 tehnıka men jabdyq satyp alý josparlanyp otyr. Jyl basyndaǵy derek boıynsha, orman salasyndaǵy shtattyq qyzmetshilerdiń sany – 11 883 adam. Onyń ishinde 461 shtat bos tur. 2022 jyly joǵary oqý oryndaryn orman sharýashylyǵynyń 1756 mamany bitirip shyǵýy kerek (bakalavrıat – 1726, magıstratýra – 22, doktorantýra – 8)», - delingen Premer-Mınıstr jaýabynda.