Ormanǵa jumsalatyn qarjyny jylda 400 mln teńgege ulǵaıtyp otyrý qajet - Nysanbaev
Bul týraly búgin Úkimettiń selektorlyq rejimdegi otyrysynda QR Aýyl sharýashylyǵy vıtse-mınıstri Erlan Nysanbaev aıtty, dep habarlaıdy QazAqparat.
«Respýblıkanyń orman qorynyń jalpy alqaby - 29,4 mln gektar, onyń ishinde orman kómkergen jerler - 12,7 mln gektar. El aýmaǵynyń nebári 4,7 paıyzyn ǵana orman kómkergen. Bul oraıda bıik dińdi aǵashtardyń úlesi nebári 3,3 mln gektardy nemese respýblıka aýmaǵynyń 1,2 paıyzyn quraıdy. Osy jáıtti eskere otyryp, mynadaı sharalar qoldanyldy: 2004 jyldan jumyr aǵash eksportyna tyıym salyndy; 2015 jyldan sekseýil ormandarynda aǵash kesýdiń barlyq túrine moratorıı jarııalandy; ústimizdegi jyly respýblıkanyń saýda oryndarynda sekseýil satýǵa tyıym salý sharasy engizildi; sonymen birge bıyl aǵashy órtengen jerlerdi qalpyna keltirýdi qosa alǵanda, qylqan japyraqty ormandarda sanıtarııalyq maqsatta aǵash kesýge tyıym salyndy», - dedi Nysanbaev.
Onyń aıtýynsha, orman sharýashylyǵyn júrgizýdiń negizgi qujattary orman ornalastyrý materıaldary bolyp tabylady. Qazirgi kezde 30 orman sharýashylyǵynda 6,2 mln gektar jáne 12 erekshe qorǵalatyn tabıǵı aýmaqta 3,5 mln gektar memlekettik orman qory alqabynda orman ornalastyrý jobalary júrgizilmegen.
«Bul problemany sheshý úshin orman ornalastyrý jumystaryn qarjylandyrýdy 2022 jylǵa deıin ortasha eseppen alǵanda jylyna 400 mln teńgege kezeń-kezeńmen ulǵaıtyp otyrý qajet», - dedi ol.