Ormandy jerlerdi tıimdi basqarýdyń jańa tetikteri engizildi - Senat
ASTANA. KAZINFORM — Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine orman sharýashylyǵy, erekshe qorǵalatyn tabıǵı aýmaqtar jáne jeke kásipkerlik sýbektileriniń mindettemelerine kepildik berý máseleleri boıynsha ózgerister men tolyqtyrýlar engizý týraly» Zańy maquldandy.
Parlament Senatynyń depýtattary bastamashylyq jasaǵan Zań erekshe qorǵalatyn tabıǵı aýmaqtar (EQTA) salasyndaǵy zańnamany jetildirýge, EQTA salasyndaǵy quqyqtyq retteýdegi olqylyqtardy joıýǵa baǵyttalǵan.
- Maquldanǵan zań orman sharýashylyǵy jáne erekshe qorǵalatyn tabıǵı aýmaqtar salasyndaǵy zańnamany jetildirý maqsatymen ázirlengen. Jańa normalar Qazaqstan Respýblıkasy jer qorynyń jekelegen sanattaryn qoǵamdyq jáne memlekettik múddelerdi eskere otyryp paıdalaný erekshelikterin naqtylaıdy. Sonymen qatar zań aıasynda jeke kásipkerlik sýbektileriniń mindettemelerine kepildik berý júıesin qamtamasyz etetin arnaıy qordyń qyzmeti rettelip otyr. Zańnyń maquldanýy ormandy jerlerdi jáne erekshe qorǵalatyn tabıǵı aýmaqtardy tıimdi basqarýǵa múmkindik beredi, - dedi Senat tóraǵasy Máýlen Áshimbaev.
Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń málimetine qaraǵanda, zań aıasynda Jer, Orman, Kásipkerlik, Eńbek jáne Bıýdjet kodeksterine, sondaı-aq Qazaqstan Respýblıkasynyń 9 zańyna ózgerister men tolyqtyrýlar engizildi.
ańda mynalardy kózdeıtin túzetýler engiziledi:
- jergilikti halyqtyń muqtajdary úshin Alakól memlekettik tabıǵı qoryǵynyń aýmaǵynda shóp shabýǵa ruqsat beretin normalar;
- ormandy kómirtekti ofsetterine quqyqty ıelený jáne olardy satý máseleleri;
- orman órtterin sóndirý úshin áýe kemelerin tartqan jaǵdaıǵa avıaotyn rezervin qurý jónindegi normalar;
- aýyldyq jerlerde qyzmetin júzege asyratyn tabıǵat qorǵaý mekemeleri jumyskerleriniń laýazymdyq aılyqaqysyn keminde 25 paıyzǵa kóterý;
- jeke kásipkerlik sýbektileriniń qaryzdaryna kepildik berý quraldaryn keńeıtý jónindegi normalar.
Budan basqa, Zańda EQTA-da ornalasqan týrızm obektilerine ınjenerlik ınfraqurylymdy (joldardy, kópirlerdi, elektr berý jelilerin jáne basqa da kommýnıkatsııalardy) jobalaý, salý jáne olarǵa qyzmet kórsetý máselelerin kózdeıtin túzetýler engiziledi. Osyǵan baılanysty quzyretti memlekettik organdarǵa ınfraqurylym máselelerin retteý bóliginde ókilettikter beriledi, sondaı-aq bıýdjettiń shyǵys bóliginiń máseleleri reglamentteledi.
Aıta keteıik, Parlament Májilisi erekshe qorǵalatyn tabıǵı aýmaqtarǵa qatysty zańdy bıyl maýsym aıynyń basynda qabyldady.