Ekologııa mınıstri Premer-mınıstrden kómek surady
ASTANA. KAZINFORM — Ormandaǵy órt qaýipsizdigin áýeden kúzetýge bólingen qarajat jetpeı jatyr. Úkimet otyrysynda Ekologııa jáne tabıǵı resýrstar mınıstri Erlan Nysanbaev osyndaı másele kóterip, Úkimet basshysynan kómek surady.
— Memlekettik orman qorynyń órtke neǵurlym osal ýchaskelerin baqylaý úshin ushý ýaqytynyń 10 453 saǵattyq normasy belgilendi. Alaıda respýblıkalyq bıýdjette qarastyrylǵan qarjy jetkiliksiz. Qurmetti Oljas Abaıuly, osy mańyzdy máseleni sheshýge yqpal etýińizdi suraımyz, — dedi vedomstvo basshysy.
Mınıstrliktiń qosymsha bergen aqparatyna sensek, bul maqsatqa taǵy 11 mlrd teńge kerek.
Aıta keteıik, Shyǵys Qazaqstan oblysy Zaısan aýdanynda órt sóndirýshiler qamys pen shópti sharpyǵan tilsiz jaýmen áli kúresip jatyr. Sonnymen qatar orman sharýashylyqtaryn tehnıkamen jabdyqtaý bıýdjeti 5,6 mlrd teńgege qysqarǵan.