Ormandardyń órtenýine joǵary kerneýli jelilerdiń qatysy joqtyǵy týraly KEGOC-tyń habaryn komıssııa qýattady
ASTANA. Qyrkúıektiń 30-y. QazAqparat - Qyrkúıektiń 8-inde Pavlodar oblysynda bolǵan órt kezinde «KEGOC» aktsıonerlik qoǵamynyń joǵary kerneýli jelileriniń isten shyǵý faktisi boıynsha Qazaqstan Respýblıkasy Indýstrııa jáne jańa tehnologııalar mınıstrliginiń Memlekettik energetıkalyq qadaǵalaý komıteti komıssııasynyń qorytyndysy shyqty.
Komıssııa ázirlegen akt boıynsha, qysqa tuıyqtalýǵa elektr jelisine jol boıynan jetken órttiń sebep bolǵany rastaldy.
Elektr jelisi (500 kV-tyq «EEK - Rýbtsovsk» JJ men 1150 kV-tyq «Ekibastuz 1150 - Altaı» JJ) joǵary temperatýranyń nátıjesinde áýe keńistigindegi elektr tyǵyzdyǵynyń tómendeýinen (ıondalýy), aýaǵa tútin men órt ushqyndarynyń taraýy saldarynan isten shyqqan. Elektr jelisin paıdalaný erejesiniń buzylýy fakti tirkelmegen.
Júrgizilgen tekserý, qyrkúıektiń 8-inde aldymen Pavlodar oblysynyń Sharbaqty aýdanynda órt shyǵyp, sonyń saldarynan elektr jelisi isten shyqty degen «KEGOC» AQ habaryn rastady.
Arnaıy komıssııa qorytyndysy osy jaǵdaıǵa oraı BAQ betterinde «Ertis ormany» mekemesiniń ókilderi taratqan orman alqabynyń órtke shalynýyna «KEGOC» AQ qatysty ekendigi týraly negizsiz málimetterdi joqqa shyǵardy.
Qyrkúıektiń 17-sinde qurylǵan komıssııa quramyna elektr energetıkasy salasynyń quzyretti sarapshylary, onyń ishinde reseı mamandary da endi.
«Tehnıkalyq turǵydan alǵanda, joǵary kerneýli jelilerdiń órt qaýpin týǵyzý múmkindigi týraly málimet bul rette joqqa shyǵyp otyr. Komıssııanyń qorytyndysyn Pavlodar oblysy Tótenshe jaǵdaılar departamentiniń aqparaty men Reseı Federatsııasy Altaı ólkesiniń sáıkes qyzmet oryndary rastap otyr, ıaǵnı órttiń tutanýy erterek - 11:20-da (Astana ýaqytymen) tirkelgen. Sodan keıin, Sharbaqty aýdanyndaǵy órt saldarynan 11:28-de 500 kV-tyq «EEK - Rýbtsovsk» JJ isten shyqqan», deıdi komıssııa tóraǵasy, QR Indýstrııa jáne jańa tehnologııalar mınıstrliginiń Memlekettik energetıkalyq qadaǵalaý komıteti tóraǵasynyń orynbasary Amanjol Alpysbaev.
