Ormandardy otaý tabıǵatqa álemdegi barlyq avtomobılderden shyqqan tútinnen beter zııan tıgizedi
ASTANA. 27 naýryz. QazAqparat - Júz keli makýlatýra bir aǵashty saqtap qalýǵa kómektesedi, al ǵalamshardaǵy tastandy qoqystyń tórtten biri qaǵaz qaldyqtary ekenin esepke alar bolsaq, bir jyldyń ishinde tutastaı orman aǵashtary kesilýiniń aldyn alýǵa bolady.
Halyqty makýlatýra jınaýǵa tartý jáne tabıǵı qorlarǵa uqyptylyqpen qaraýdy qalyptastyrý maqsatynda Kazakhstan Kagazy kompanııasy men British Council «Aǵashty qutqar» baıqaýyna bastamashy boldy, dep habarlady British Council kompanııasynyń baspasóz qyzmeti.
Búgin Almatyda British Council keńsesinde osy baıqaýdaǵy tańdaýly jobalardyń tanystyrylymy ótedi. Baıqaý qorytyndysymen qoǵamnyń qaǵaz qaldyqtaryn jınaýǵa kózqarasyn ózgertý jónindegi tańdaýly joba avtorlaryna 100 000 teńge kólemindegi bas júlde beriletin boldy. Baıqaýǵa barlyǵy 23 ótinim kelip tústi. Jumystarǵa «Tabıǵat» ekologııalyq qozǵalysynyń tóraǵasy Mels Eleýsizov jáne Kazakhstan Kagazy kompanııasynyń ókilderi sarapshylyq jasaıdy.
Shara barysynda British Council Ulybrıtanııanyń qaldyqtardy óńdeý jáne óńdelgen materıaldardy tıimdi paıdalaný máseleleri jónindegi jetekshi uıymdarynyń biri - WRAP kompanııasymen birlesip beınekonferentsııa uıymdastyrady. Olar qazaqstandyq ekologııalyq uıymdarmen qaıtalama shıkizatty tıimdi paıdalaný jóninde óz tájirıbelerimen bólispek.
Eske sala keteıik, Almaty qalalyq qorshaǵan ortany qorǵaý basqarmasynyń málimetteri boıynsha, Almaty turǵyndary jyl saıyn 500 tonnaǵa deıingi qoqysty kádege jaratady. Eýropada makýlatýra qabyldaý jyl ishinde óndirilgen qaǵazdyń 50-70 paıyzyn, Reseıde - 10-12 paıyzdy quraıdy. Bir tonna qaǵaz óndirý úshin 98 tonna basqa resýrstar paıdalanylady. Bir tonna qaǵaz daıyndaýǵa 1 tonna qurysh óndirisi úshin qajetti elektr energııasy jumsalady. Ormandardy otaý tabıǵatqa álemdegi barlyq avtomobılderden shyqqan tútinnen beter zııan tıgizedi.
