Ormandardy baqylaý kúsheıtildi: Adamı faktordy tehnıka tolyqtyrady

ASTANA.KAZINFORM – Tsıfrlyq transformatsııa sheńberinde ekologııa salasynda orman órtterin erte anyqtaýdyń avtomattandyrylǵan júıesi engizildi. Bul týraly Ortalyq kommýnıkatsııalar qyzmetinde ótken baspasóz máslıhatynda QR Tsıfrlyq damý, ınnovatsııalar jáne aeroǵrysh ónerkásibi vıtse-mınıstri Mýn Dmıtrıı Andreevıch málimdedi.

Ol óz sózinde, atalǵan júıe áreket etý ýaqytyn úsh ese qysqartýǵa, órt aýdanyn jıyrma ese azaıtýǵa jáne sóndirý shyǵyndaryn on bes ese azaıtýǵa múmkindik beredi.Búgingi tańda 1,3 mln gektardy qamtıtyn alańdarda 148 kamera ornatylǵanyn atap ótti. 

– Adamı faktor bar ekenin moıyndaý kerek. Keı jaǵdaılarda adam qaýip-qaterdi baıqamaı qalýy múmkin, sebebi ol kamera sekildi alysty kóre almaıdy. Al zamanaýı úlkeıtkish múmkindikteri bar tehnıkalyq qurylǵylar bul máselede áldeqaıda tıimdi. Búginde orman alqaptaryndaǵy órt qaýipsizdigine jaýapty barlyq ormanshylar óz oryndarynda jumysyn jalǵastyrýda, olardy qysqartý týraly áńgime joq. Alaıda qaýip-qaterlerdiń aldyn alý maqsatynda qosymsha beınebaqylaý kameralary ornatyldy. Bul kameralar qaýipke jedel áreket etýge jáne alystan kórýge aıtarlyqtaı kómektesedi, – dedi spıker.

Budan basqa, shyǵaryndylardy baqylaý bóliginde barlyq ekologııalyq aqparattyq júıelerdi biriktiretin platforma engizildi. Buryn kásiporyndar qaǵaz eseptilikti jáne ólsheýlerdi qolmen júrgizgen bolsa, búginde bul ózgertildi: kásiporyn qubyrlarǵa ár 20 mınýt saıyn onlaın rejıminde ınternet arqyly aqparatty biryńǵaı platformaǵa jiberip otyratyn tıisti datchıkterdi ornatýǵa mindetti. 

– Qazirgi ýaqytta tabıǵatty paıdalanatyn 91 mindetti kásipornynyń 76-sy qosylǵan. Bul jobany byltyr bastadyq. Ol kezde olardyń sany 10 bolǵan, - dedi Dmıtrıı Mýn.

Aıta keteıik, Shyǵys Qazaqstan oblysynda joǵary órt qaýpi tirkelip, 26 tamyzdan bastap oblystyń soltústiginde, ońtústik-shyǵysynda, ortalyǵynda joǵary órt qaýpi tirkelgen. 

Sondyqtan ázirge ormanǵa barýǵa tyıym salynǵan bolatyn.