Ormandardaǵy baqylaý munaralarynyń bárinde birdeı táýliktik kezekshilik uıymdastyrylmaǵan - TJM ókili
STANA. Tamyzdyń 16-sy. QazAqparat /Marlan Jıembaı/ - Respýblıka ormandaryndaǵy baqylaý munaralarynyń bárinde birdeı táýliktik kezekshilik uıymdastyrylmaǵan. Bul týraly búgin Úkimet úıinde QR Premer-Mınıstriniń birinshi orynbasary Ómirzaq Shókeevtiń tóraǵalyǵymen ótken selektorlyq keńes barysynda elimizdiń Tótenshe jaǵdaılar vıtse-mınıstri Valerıı Petrov málim etti.
Onyń aıtýyna qaraǵanda, órt qaýipsizdigin qamtamasyz etý máseleleri boıynsha orman alqaptaryna taqaý ornalasqan eldi mekenderdi jáne memlekettik orman ıelenýshiler men paıdalanýshylardy tekserý jónindegi nusqaýlyq ázirlengen. Osyǵan oraı 154 orman qorǵaý uıymnyń qazirgi ýaqytta 104-iniń tekserilgendigin atap ótken V.Petrov atalǵan mekemelerge ortaq bolyp otyrǵan birqatar kemshilikterge toqtaldy.
«Tekserilgen barlyq uıymdarda órt-tehnıkalyq qural-jabdyqtar sany jetkiliksiz. Ormandardaǵy baqylaý munaralarynyń keıbirinde kúndiz-túni kezekshilik uıymdastyrylmaǵan. Ormandy aǵash kesindilerinen jáne órttiń tutanýyna sebep bolatyn qoqystardan tazartý jumystary júrgizilmegen. Buqaralyq aqparat quraldarynda órt qaýipsizdigi erejelerin saqtaý máselesi jetkilikti deńgeıde kóterilip otyrǵan joq. Sonymen qatar órt sóndirýshiler men júrgizýshiler ishinara arnaıy ortalyqtardan biliktilik arttyrýdan ótpegen», dedi vıtse-mınıstr.
V.Petrovtyń aıtýynsha, tekserý jumystary qazirgi ýaqytta jalǵasyn tabýda.
