Ormanda órt qaýipsizdigin qamtamasyz etetin 800-den astam mobıldik top quryldy
ASTANA. KAZINFORM – Elimizde jyl basynan beri 89 orman órti tirkelgen. Bul ótken jylmen salystyrǵanda 2,8 esege az. Bul týraly Tótenshe jaǵdaılar mınıstrliginiń órtke qarsy qyzmet komıteti tóraǵasynyń orynbasary Marǵulan Amanbaev aıtty.
Atalǵan maman byltyr bolǵan alapat órt oqıǵalary bıyl qaıtalanbaıtynyn atap ótti.
«Tabıǵı órtti órshitpeý maqsatynda memlekettik organdarmen aldyn alý is-sharalary júrgizildi. «Ekologııa jáne tabıǵı resýrstar mınıstrligimen birlesip, tótenshe jaǵdaıǵa áreket etý kezinde basqarý jáne ózara árekettesý algorıtmi bekitildi. Munda ortalyq memlekettik jáne jergilikti atqarýshy organdardyń naqty mindetteri men is-qımyldary aıqyndaldy. Ol úshin órt qaýipsizdigi salasyndaǵy barlyq normatıvtik-quqyqtyq aktige taldaý jasaldy. Orman órtterine qarsy kúrestegi halyqaralyq tájirıbe zerdelenip, tıisti usynystar ázirlendi», - deıdi Marǵulan Amanbaev.
Sonymen qatar respýblıkalyq komandalyq-shtabtyq oqý-jattyǵýlary ótkizilgen. Qazirgi tańda tilsiz jaýdy aýyzdyqtaýǵa der kezinde den qoıý úshin órt qaýipti óńirlerde memlekettik avıatsııanyń sý tógetin qurylǵylary bar áýe kemeleriniń kezekshiligi uıymdastyrylǵan.
«2023 jylǵy órtke baılanysty statıstıkalyq málimetterdi eskere otyryp, TJM men ETRM birlesken buıryǵymen 2024 jylǵy órt qaýpi joǵary maýsymda el aýmaǵynda orman jáne dala órtteri táýekelderin tómendetý jáne olardy joıý jónindegi is-sharalar jospary bekitildi», - dep málimdedi Marǵulan Amanbaev.
Orman alqaptarynda órt qaýipsizdigin qamtamasyz etetin 800-den astam mobıldik top qurylǵan. Olar 6 400 reıd júrgizip, 1 930 adamdy ákimshilik jaýapkershilikke tartqan. Qazirgi tańda órt sóndirý qyzmetterinde 3 300-den astam tehnıka bar. Bıyl taǵy 288 birlik órt sóndirý tehnıkasyn, 4 500-den astam jabdyq pen 3 300-den astam órt sóndirýshi kıimin satyp alý josparlanyp otyr.
Asylbek TOIBEK
