Ormanda mangal paıdalanýǵa bola ma – TJM mamanynyń jaýaby

ASTANA. KAZINFORM – Jyl basynan beri 800-den astam adamǵa órt qaýipsizdigini saqtamaǵany úshin aıyppul salynǵan. Bul týraly Tótenshe jaǵdaılar mınıstrligi Órtke qarsy qyzmet komıtetiniń bas mamany Eldos Zııada elordada ótken baspasóz máslıhatynda aıtty.

- Jyl basynan beri 800-den astam adamǵa órt qaýipsizdigini saqtamaǵany úshin aıyppul salynǵan. Ol aıyppuldardy tótenshe jaǵdaılar qyzmetinen bólek polıtsııa, ekologııa qyzmetiniń ókilderi de salǵanyn aıtý kerek. 

Jeke bizge kelsek, 410-bap boıynsha órt qaýipsizdigin saqtamaǵany úshin jeke tulǵaǵa 5 aılyq eseptik kórsetkishke (19 660 teńge) deıin aıyppul salamyz. Ol degenimiz – saıajaı aýmaqtarynda qurǵaq shópterdi órtegen kezde ara qashyqtyqty saqtamaý, aýa qurǵaq ári jeldi kúni ot jaǵý sııaqty áreketter. ıAǵnı, mundaı aýa raıynda ashyq keńistikte, tabıǵat aıasynda, orman ishinde, saıajaı aýmaǵynda alaý tutatýǵa múldem tyıym salynady, - deıdi ol.

Sondaı-aq, orman ishinde arnaıy demalys bazasynyń aýmaǵynan basqa jerde ot jaǵýǵa qatań tyıym salynǵanyn eske saldy.

- Orman sharýalyǵy qyzmeti orman alqaptarynda múlde ot jaǵýǵa tyıym salady. Arnaıy demalys oryndarynda, ot jaǵýǵa arnalǵan oryndarda ǵana ot jaǵýǵa, mangal sııaqty qurylǵylardy qoldanýǵa bolady.

Órtke qarsy kúres maýsymy bastalǵannan beri Tótenshe jaǵdaılar qyzmeti tolyq kúsheıtilgen rejımde jumys istep jatyr. Al erekshe nazar Shyǵys Qazaqstan, Abaı, Pavlodar, Soltústik Qazaqstan, Aqmola oblystaryna bólinedi. Biraq Shyǵys Qazaqstanda orman kóp bolsa, Qaraǵandy, Ulytaý oblystarynda dala órtiniń qaýpi joǵary. Sondyqtan búkil respýblıka boıynsha kúsheıtilgen rejımdi jumys isteımiz, - dedi Eldos Zııada.

Buǵan deıin Ekologııa jáne tabıǵı resýrstar mınıstri Erlan Nysanbaev ormanda seıil quryp, tabıǵat aıasynda demalys ótkizýdiń sharttaryn túsindirgen edi.