Ormanda adasqan balalardy ıtteri qutqaryp qaldy
ASTANA. QazAqparat - Reseıdiń Sverdlov oblysynda qutqarýshylar ormanda táýlikke jýyq ýaqyt adasyp júrgen eki jasóspirim balany izdep tapty,dep habarlaıdy óńirlik TJM basshylyǵynyń saıty.
Habarlamada balalardyń Kýshvy qalasynan 30 shaqyrym jerde orman ishinen tabylǵany aıtylady. Ekeýiniń de jaǵdaıy ortasha, aıaqtarynyń ókshe tustaryn úsik shalýyna baılanysty balalar aýrýhanaǵa jatqyzylǵan.
Jergilikti BAQ taratqan aqparattarǵa súıensek, joǵalǵan jasóspirimder túnde orman ishinde túnegen. Sirińke bolmaǵandyqtan, ot jaǵa almaǵan. Uldardyń jandaryndaǵy tórt aıaqty dostary olarǵa jylynýǵa kómektesipti.
Balalardy izdeýge 200-den astam adam jumyldyrylǵan.
