Orman zııankesterimen, aýrýlarymen kúres sharalary bıýdjet qarajaty esebinen atqarylady

Búgin QR Parlamenti Májilisinde «Qazaqstan Respýblıkasynyń keıbir zańnamalyq aktilerine orman sharýashylyǵy, janýarlar dúnıesi jáne erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda Aýyl sharýashylyǵy vıtse-mınıstri Marat Orazaev osylaı málim etti.

Zań jobasyna sáıkes, jekeshe orman ósirýdi damytý maqsatynda Jer kodeksine saýda-sattyq pen aýktsıondar ótkizbeı-aq memlekettik menshiktiń qaraýyndaǵy jer ýchaskelerine nemese jer telimderin jalǵa berý jóninde normalar engiziledi.

«Sondaı-aq, aldaǵy ýaqytta orman zııankesterimen, aýrýlarymen kúresti tıimdi júrgizý maqsatynda respýblıkalyq bıýdjetten qarajat bólinip turady. Jylma-jyl bul baǵyttaǵy sharalar bıýdjet qarajaty esebinen atqarylatyn bolady. Máselen, ormannyń erekshe qaýipti zııankesteri men aýrýlarynyń oshaqtarymen kúres sharalary úshin bıýdjetten 131,4 mln. teńge qarastyrylǵan. Budan bólek, Úkimettiń quzyretine qatysty normalar keńeıtildi», - dedi M. Orazaev.

Onyń aıtýynsha, energııanyń qalpyna keltiriletin kózderin, ıaǵnı kún men jel energııasyn paıdalaný jóninde nysandar salý úshin memlekettik orman qory jerlerin alý jónindegi Úkimettiń quzyreti keńeıtildi. Shoq ormandar ornalasqan jer ýchaskelerin esepke alý jáne olardy kadastrǵa bólý birlikterin belgileý maqsatynda eseptik oramǵa kadastrlyq nómir belgilenip, bir sáıkestendirý qujatyn berý usynylady.