Orman jáne tabıǵat qorǵaý qyzmetkerleriniń jalaqysyn kóterýge 8,5 mlrd teńge qarastyrylǵan - Úkimet
ASTANA. KAZINFORM - Bıylǵy 1 shildeden bastap elimizdiń orman jáne tabıǵat qorǵaý mekemeleriniń qyzmetkerleri laýazymdyq jalaqylaryna ústemeaqy ala bastaıdy. Tıisti qaýlyǵa QR Premer-Mınıstri Oljas Bektenov qol qoıdy.
Atap aıtqanda, orman jáne tabıǵat qorǵaý uıymdarynyń qyzmetkerlerine eńbekaqy tóleý júıesin, sharttary men mólsherin jaqsartý maqsatynda «Azamattyq qyzmetshilerge, memlekettik bıýdjet qarajaty esebinen ustalatyn uıymdardyń, qazynalyq kásiporyndardyń qyzmetkerlerine eńbekaqy tóleý júıesi týraly» QR Úkimetiniń qaýlysyna ózgerister engizildi.
Qujatqa sáıkes orman órtin sóndirý stansalarynyń, orman mekemeleriniń, tabıǵat qorǵaý jáne orman ornalastyrý uıymdarynyń qyzmetkerleri laýazymdyq jalaqylaryna 100%-ǵa deıin ústemeaqy alady. Olardyń ishinde orman órtin sóndirýshiler, órt sóndirý mashınalarynyń júrgizýshileri, traktorshy-mashınıster, radıooperatorlar, órt sóndirý mashınalaryn, jabdyqtary men apparatýralaryn jóndeıtin slesarmlar, órt-baqylaý munarasynyń baqylaýshylary bar.
Sondaı-aq 113 avıatsııalyq kúzet órt sóndirýshi-desantshysynyń jalaqysy kóteriledi.
Qaýlyny iske asyrýǵa 2024-2027 jyldarǵa arnalǵan respýblıkalyq bıýdjetten 8 480,1 mln teńge kóleminde qarjylyq shyǵyndar kózdelgen.
Barlyǵy 3 300-ge jýyq qyzmetker qosymsha aqymen qamtylatyn bolady.
Jergilikti atqarýshy organdardyń orman sharýashylyǵy mekemeleriniń orman órtin sóndirý stansalarynyń 1619 qyzmetkerine qosymsha aqy tóleýdi qarjylandyrý jergilikti bıýdjet qarajaty esebinen josparlanady.
Buǵan deıin QR Parlamenti Senatynyń depýtaty O. A. Býlavkınanyń suraýyna jaýap bere otyryp, Úkimet basshysy orman jáne tabıǵatty qorǵaý mekemeleriniń barlyq qyzmetkerleriniń jalaqysyn kóterý máselesi óziniń turaqty baqylaýynda ekenin jáne tıisti qaýlynyń jobasy daıyndalǵanyn aıtty. Depýtat «Semeı ormany» RMM Borodýlıha fılıalynyń qyzmetkerleri úshin qosymsha aqylar taqyrybyn kóterdi.
Esterińizge sala keteıik, 2023 jyldyń shildesinde Memleket basshysy Q. Toqaevtyń tapsyrmasyn iske asyrý aıasynda orman qurylymdary qyzmetkerleriniń ómirine jáne densaýlyǵyna qaýip tóndiretin jumysy úshin laýazymdyq jalaqylaryna 100% ústemeaqy belgilendi.
