Orman jáne dala órtiniń aldyn alý jáne joıý máselesi árqashan da basty nazarda bolýy qajet - QR Tótenshe jaǵdaılar mınıstri
ASTANA. Tamyzdyń 21-i. QazAqparat /Marlan Jıembaı/ - Orman jáne dala órtiniń aldyn alý jáne joıý máselesi árqashan da basty nazarda bolyp, atalǵan tabıǵı apatqa qarsy áreket etýge daıyn bolýymyz qajet. Bul týraly búgin órt qaýipsizdigi máselelerine qatysty selektorlyq keńes ótkizgen elimizdiń Tótenshe jaǵdaılar mınıstri Vladımır Bojko aıtty.
Bul oraıda alqaly jıynǵa qatysýshylardyń nazaryn Reseı Federatsııasynda oryn alǵan tabıǵı apatqa aýdarǵan ol «aǵymdaǵy jyly Reseıdiń órt shalǵan aýmaǵy 10,5 mıllıon gektardy qurady. Al Tótenshe jaǵdaılar mınıstrligi órtti aýyzdyqtaý úshin 12 mıllard rýbl shyǵyndady. Árıne bul aýqymdy qarjy. Alaıda Reseıdegi órtten qaza bolǵan adamdardyń ornyn eshqandaı aqsha toltyra almaıdy», dedi.
Sonymen qatar onyń atap ótýinshe, Úkimet basshysynyń órt qaýipsizdigi máselelerine oraı ótkizgen selektorlyq keńesten beri, ıaǵnı 2 aptanyń ishinde ǵana 28 orman jáne 108 dala órti tirkelgen. Al órt qaýpi kezeńi týyndaǵannan beri ákimdikterdiń kommýnaldyq menshigine berilgen aımaqtarda jalpy aýmaǵy 4 364 gektardy quraıtyn 267 órt oryn alǵan.
Tótenshe jaǵdaılar, Aýyl sharýashylyǵy, Іshki ister mınıstrlikteriniń ókilderi qatysýymen ótip jatqan keńes jumysynda orman jáne dala alqaptarynyń órt qaýipsizdigin qamtamasyz etý, basqa memleketterdiń tabıǵı órtti aýyzdyqtaý jáne joıý tájirıbelerin qarastyrmaq. Alqaly jıyn qorytyndysy boıynsha ázirlengen hattamaǵa QR Tótenshe jaǵdaılar mınıstri qol qoıyp, ol barlyq oblystarǵa jáne múddeli uıymdarǵa jiberiletin bolady.
