Orman sharýashylyǵynyń ózekti máseleleri sheshimin tabar emes - QR AShM

ASTANA. QazAqparat - QR AShM Orman sharýashylyǵy jáne janýarlar dúnıesi komıteti tóraǵasynyń orynbasary Qaırat Ústemirov orman sharýashylyǵynda qandaı ózekti máseleler baryn atady, dep habarlaıdy «QazAqparat» HAA tilshisi.

«Ókinishke qaraı, sońǵy jyldary eki óńirdi (Almaty men OQO) eseptemegende oblys ákimdikteri orman sharýashylyǵyn jandandyrý baǵytynda eshqandaı sharalardy qabyldamady. Orman sharýashylyǵy mekemelerine «qarjynyń qaldyǵynan bólý» qaǵıdaty boıynsha aqsha bólinip keledi. Ormandardy qorǵaý mekemeleriniń materıaldyq jáne tehnıkalyq qamtamasyz etilýi normatıvpen salysyrǵanda bar-joǵy 65 paıyzdy qurap otyr. Sala qyzmetkerleriniń jumysynyń sapasy túsip ketti. Bilikti kadrlar bul saladan ketip jatyr. Buǵan deıin aıtqanymdaı, orman ónimderiniń de ónimdiligi tómendep ketken», - deıdi Qaırat Ústemirov.

Onyń aıtýynsha, másele sheshilmese QR Aýyl sharýashylyǵy mınıstrligi naqty qadamdarǵa májbúr bolmaq.

«Osyǵan baılanysty oblys ákimdikterine atalǵan jaǵdaıdy jaqsartýǵa qatysty birqatar tapsyrmalar berilgen. Alaıda (...). Eger jaǵdaı aldaǵy úsh jylda jaqsarmaıtyn bolsa, QR AShM «Orman sharýashylyǵy mekemelerin oblys ákimdikterine qaratý tıimdi me?» degen suraqty kóteretin bolady», - deıdi Qaırat Ústemirov.