Orman sharýashylyǵy men janýarlar dúnıesin qamtıtyn zań qabyldandy
ASTANA. 28 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine orman sharýashylyǵy,
janýarlar dúnıesi jáne erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda talqylap, qujatty qabyldady
Qujat orman sharýashylyǵyn, erekshe qorǵalatyn tabıǵı aýmaqtardy damytý jáne janýarlar dúnıesin qorǵaýdy, ósimin molaıtý men paıdalanýdy jaqsartý maqsatynda ázirlengen.
Bul rette qujatty qabyldaý tabıǵat qorǵaýdy retteý salasynda qoldanystaǵy zańnama normalaryn ushtastyrýdy qamtamasyz etedi. Sonymen qatar, zańsyz ań aýlaýdan, aǵashtar men butalardy zańsyz kesýden, sırek kezdesetin jáne joıylyp ketý qaýpi tóngen janýarlar men ósimdikter túrlerine zańsyz aralasý bolyp tabylatyn áreketter jasaǵany úshin qylmystyq jáne ákimshilik jaýaptylyqty kúsheıtýge múmkindik týǵyzady. Zań jobasyna engiziletin ózgerister men tolyqtyrýlar erekshe qorǵalatyn aýmaqtar jerlerin Qazaqstan memlekettik shekarasy nysandaryn salý jáne orman sharýashylyǵyn júrgizýge baılanysty emes basqa da maqsattar úshin bosalqy jerlerge aýystyrýdy retteýge de qatysty bolyp tabylady. Budan bólek, memlekettik retteý salasyndaǵy Úkimettiń quzyreti naqtylanady. Memlekettik orman tabıǵı rezervattary aımaǵy aýmaǵynda sharýashylyq qyzmetin shekteý rejimi aıqyndalady. Ańshylyq sharýashylyǵyn ornyqty júrgizýdiń quqyqtyq negizderi belgilenedi.
Zań jobasyn talqylaý barysynda senatorlar birqatar tolyqtyrýlar engizgen bolatyn. Atap aıtqanda, Jer kodeksine orman ósirý úshin saýda-sattyq pen aýktsıon ótkizbesten memlekettik menshiktegi jer ýchaskelerine quqyqty berý nemese jer ýchaskelerin jalǵa beri jónindegi normalar engizildi. Budan bólek, ormannyń asa qaýipti zııankesteri men aýrýlar oshaqtarymen kúres jónindegi sharalardy qarjylandyrý tetikteri alǵash ret aıqyndalyp otyr. Onyń ishinde jeke orman ósirýdi memlekettik qoldaý, sol úshin yntalandyrý men ınvestıtsııalar tartý kózdeledi. Sondaı-aq mektep ormanshylyǵy mártebesin zańnamalyq deńgeıde bekitý usynylady.
Sonymen qatar, qujatta jergilikti memlekettik basqarý organdarynyń quzyretine bekitilmegen ań aýlaý jáne balyq sharýashylyǵy sý aıdyndary men ýchaskelerde janýarlar aýrýǵa shaldyqqan, olarǵa qyrylyp qalý qaýpi tóngen jaǵdaılarda kómek kórsetý is-sharalaryn uıymdastyrý týraly normalar engizildi. Bekire tuqymdas balyqtardyń tabıǵı ortadan joıylyp ketýi, olardy satyp alý, qaıta óńdeý men olardyń ýyldyryǵyn eksporttaý jónindegi qyzmetterge memlekettik monopolııanyń tetikterin iske asyrý jónindegi normalar da qamtylyp otyr.
Budan basqa, qoryqshy qyzmetiniń qyzmetkerlerine ań aýlaýda paıdalanýǵa qyzmettik qarýmen, baılanys quraldarymen, aıyrym belgileri bar arnaıy kıimmen jáne qyzmettik kýálikpen qamtý normalary da qarastyrylyp otyr.
Parlament qabyldaǵan zań Memleket basshysynyń qol qoıýyna jiberiledi.
