Orman sharýashylyǵy qyzmetkerleriniń jalaqysy kóteriledi

NUR-SULTAN. QazAqparat – Elimizde orman sharýashylyǵy jáne janýarlar dúnıesi qyzmetkerleriniń jalaqysy kóteriledi. Bul jaıynda QR Premer-Mınıstriniń orynbasary Roman Sklıardyń Májilis depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.

«Respýblıkalyq bıýdjet júktemesin tómendetý, ormandardy qorǵaý máselesinde jergilikti atqarýshy organdardyń jaýapkershiligin arttyrý maqsatynda 2002 jyly oblys ákimdikteriniń jedel basqarýyna orman jáne janýarlar dúnıesin qorǵaý jónindegi 124 memlekettik mekeme berilgen bolatyn. Qazirgi ýaqytta erekshe qorǵalatyn tabıǵı aýmaqtar memlekettik orman sharýashylyǵy mekemeleriniń bazasynda jańa orman sharýashylyqtarynyń qurylýyna baılanysty oblys ákimdikteriniń qaraýynda 120 orman sharýashylyǵy bar. Olarǵa 22,6 mln gektar nemese memlekettik orman qory jalpy aýmaǵynyń 74,7 paıyzy bekitilgen», - dedi vıtse-premer jaýabynda.

Onyń atap ótýinshe, bıyl BUU damý baǵdarlamasy men Jahandyq ekologııalyq qory ormandardy basqarýdyń maqsatty stsenarııine saraptama júrgizgen.

Saraptama qorytyndysy atalǵan kezeńde oblys ákimdikteriniń qaramaǵyna berilgen orman sharýashylyǵy memlekettik mekemeleriniń laıyqty deńgeıde damymaǵanyn kórsetken.

«Osyǵan oraı ókiletti memlekettik organ qazirgi qoldanystaǵy orman sharýashylyǵyn basqarý, josparlaý jáne bıýdjet qarajatyn bólý tıimdiligine baǵalaý júrgizedi. Buǵan qosa, Memleket basshysynyń 2021 jylǵy 1 qyrkúıektegi Qazaqstan halqyna Joldaýyna sáıkes, Úkimetke osy jyldyń sońyna deıin azamattyq qyzmetshilerdiń eń tómengi jalaqysyn arttyrý bóliginde zańnamaǵa qajetti ózgertýler engizýdi qamtamasyz etý tapsyrylǵan. Osyǵan baılanysty qazirgi ýaqytta azamattyq qyzmetshiler laýazymy tizilimine orman sharýashylyǵy jáne janýarlar dúnıesi qyzmetkerlerin qosý máselesi qarastyrylyp jatyr», - dedi Roman Sklıar.