Orman sharýashylyǵy komıtetiniń 11 qyzmetkeri jemqorlyq qylmysy úshin jazalandy
Ekologııa, geologııa jáne tabıǵat resýrstary mınıstrliginiń jaýapty hatshysy Sábıt Nurlybaıdyń tóraǵalyǵymen sybaılas jemqorlyqqa qarsy kúres boıynsha keńes ótkizildi.
Keńeste zań qyzmeti departamentiniń dırektory M. Haırýllınniń sybaılas jemqorlyqqa qarsy kúrestiń aldaǵy sharalary jaıly baıandamasy tyńdaldy.
Spıker Orman sharýashylyǵy jáne janýarlar dúnıesi komıtetiniń aýmaqtyq bólimderindegi sybaılas jemqorlyqqa qarsy kúrestiń óz dárejesinde emestigine toqtaldy. Atap aıtqanda 2019 jyldyń shildesi men 2020 jyldyń tamyzy aralyǵynda 11 qyzmetker qylmystyq jaýapkershilikke tartylǵan (qyzmet babyn asyra paıdalaný, para alý, zańsyz ań aýlaý, bıýdjetten aqsha urlaý).
Jaýapty hatshy komıtet tóraǵasynyń mindetin atqarýshy N.Júnisovke komıtet qyzmetkerleri arasynda sybaılas jemqorlyq kórinisterine qarsy kúresti kúsheıtý jaıly tapsyrma berdi.
Sonymen qatar keńeste komıtetterdiń, aýmaqtyq bólimshe basshylarynyń Sybaılas jemqorlyqqa qarsy is-qımyl agenttigi jáne «Adaldyq alańy» jobasy keńsesimen birlesip, syrtqy taldaý barysynda anyqtalǵan sybaılas jemqorlyq táýekelderin joıý jaıly josparynyń oryndalý barysy tyńdaldy.
