Orman sharýashylyqtaryn tehnıkamen jabdyqtaý bıýdjeti 5,6 mlrd teńgege qysqarǵan
ASTANA. KAZINFORM — Ekologııa jáne tabıǵı resýrstar mınıstri Erlan Nysanbaev Úkimet otyrysynda oblys orman sharýashylyqtaryn tehnıkamen jabdyqtaý bıýdjeti nege qysqartylǵanyn túsindirdi.
— Orman sharýashylyqtaryn qamtamasyz etýge 2023-2027 jyldarǵa arnalǵan jalpy qarjylandyrý kólemi 68 mlrd teńge bolyp belgilengen. Bıýdjet tapshylyǵyna baılanysty respýblıkalyq bıýdjetten qarjylandyrý 8,7 mlrd teńgeden 3,1 mlrd teńgege deıin qysqardy. Mınıstrlik orman qorǵaý mekemelerin ýtıl tólem esebinen jaraqtandyrýdy usyndy. Sizdiń tapsyrmańyzǵa sáıkes orman sharýashylyqtaryn jaraqtandyrý maqsatynda lızıng arqyly 35 mlrd teńge qarastyrylǵan. Onyń ishinde 15 mlrd teńge mınıstrliktiń mekemelerine qarastyrylǵan. Búgingi kúnge jyldyń basynan bastap 3,7 mlrd teńgege 136 shaǵyn orman patrýldik kesheni men 60 traktor satyp alyndy, — dedi ol.
Vedomstvo basshysynyń aıtýynsha, maýsym aıynyń sońyna deıin quny 11,3 mlrd teńge bolatyn 166 órt sóndirý mashınasy men 27 shaǵyn orman patrýldik keshenin, 15 traktor satyp alynbaq.
— Oblys ákimdikteri mekemelerine ýtıl tólem esebinen lızıngke 20 mlrd teńge bólindi. Oǵan qosa qajetti tehnıkany satyp alýǵa jergilikti bıýdjetterde 6,3 mlrd teńge qarastyrylǵan. Osylaısha, bıyl ákimdikterdiń orman sharýashylyqtaryna jalpy quny 26,3 mlrd teńge bolatyn 186 órt sóndirý mashınasyn, 186 shaǵyn orman patrýldik keshenin jáne 247 traktordy satyp alý josparlanǵan. Qabyldanǵan sharalar elimizdiń, orman órti eń kóp bolatyn, 11 óńirdiń orman sharýashylyqtarynyń tehnıkasyn jańartyp olardy 100% jaraqtandyrýǵa múmkindik beredi, — dedi Erlan Nysanbaev.
Aıta keteıik, Shyǵys Qazaqstan oblysy Zaısan aýdanynda órt sóndirýshiler qamys pen shópti sharpyǵan tilsiz jaýmen áli kúresip jatyr.