Orman rezervattarynda aǵash kesý, óńdeý oryndaryna zań júzinde tyıym salynady

Búgin ormandy qorǵaý jáne zańsyz ań aýlaýǵa qarsy kúres sharalarynyń qorytyndysy jóninde ótken baspasóz máslıhatynda AShM Orman jáne ań sharýashylyǵy komıtetiniń tóraǵasy Erlan Nysanbaev osylaı málim etti, dep habarlaıdy QazAqparat.

«Qazirgi tańda elimizdegi orman alqaptaryn saqtaýǵa qatysty júıeli ári zańnamalyq negizde birqatar sharalar atqarylýda. Máselen, Pavlodar oblysy boıynsha orman rezervattary aýmaǵynda aǵash kesý jáne óńdeý quraldaryn, qondyrǵylaryn ornatýǵa tıym salyndy. Qazir quqyq qorǵaý organdarymen birlesip, buǵan deıin jumys istep kelgen aǵash kesý oryndaryn joıý jumystary júrgizilip jatyr. Shyǵys Qazaqstan oblysy boıynsha da aldaǵy ýaqytta osyndaı sharalar qamtylatyn bolady», dedi Komıtet tóraǵasy E. Nysanbaev.

Onyń aıtýynsha, Pavlodar men Shyǵys Qazaqstan oblystaryna qaraıtyn orman rezervattary aýmaǵynda 165-ten astam aǵash kesý jáne óńdeý oryndary bar eken. Endigi kúni jeke kásipkerlik maqsattaǵy bundaı aǵash kesý oryndaryn jaýyp, ol jumyspen tek memlekettik mekemeler ǵana aınalysatyn bolady. «Pavlodar oblysyndaǵy aǵash kesýlerdi toqtatý úshin ákimniń arnaıy qaýlysy shyqty. Degenmen, bul ýaqytsha shara bolatyny túsinikti. Sondyqtan da, bıylǵy jyly arnaıy zań jobasyn ázirlep jatyrmyz, onda «Ertis ormany» men «Semeı ormany» alqaptarynda aǵash kesip, óńdeıtin oryndarǵa tyıym salý týraly norma ataýly túrde, naqty jazylatyn bolady. Aǵashty kesip, óńdeıtin bundaı oryndardan qutylýdyń ózi úlken jetistik. Óıtkeni, orman alqaptarynda aǵashty kesip, óńdeýmen aınalysatyn bıznestiń ózi búgingi kúni alqaptarǵa úlken zalal keltirip otyr», dedi E. Nysanbaev.