Orman órtteriniń 55%-y naızaǵaıdan tutanǵan - Zúlfııa Súleımenova

ASTANA. QazAqparat – Búgin Úkimet otyrysynda baıandama jasaǵan Ekologııa jáne tabıǵı resýrstar mınıstri Zúlfııa Súleımenova byltyr bolǵan orman órtteriniń 55%-y naızaǵaıdan tutanǵanyn aıtty, dep habarlaıdy QazAqparat tilshisi.

«Qazaqstan Ǵarysh sapary» AQ-men birlesip, orman qory alańdarynyń ǵaryshtyq monıtorıngi júzege asyrylyp jatyr. Shaǵyn aýdandarda orman órtterin ýaqtyly anyqtaý jáne joıý maqsatynda 9 oblysta 8,8 mln gektar alańda avıakúzetý oryndalyp otyr. Qabyldanyp jatqan sharalarǵa qaramastan, bıyl jalpy aýdany 19,8 myń gektardan asatyn 122 orman órti tirkeldi, onyń 1,3 myń gektary – ormandy alqap», - dedi Zúlfııa Súleımenova Úkimet otyrysynda baıandama jasaı otyryp.

Sondaı-aq, mınıstr orman órtteri júrý, ótý múmkindigi bolmaıtyn aýmaqtarda jıi tirkeletinin atap ótti.

«Órtter negizinen qamyspen jabylǵan, ótýge múmkin emes batpaqty jerlerde boldy. Máselen, byltyr respýblıkanyń memlekettik orman qorynyń aýmaǵynda, ıaǵnı 104,5 myń gektar alqapta 801 orman órti oqıǵasy boldy. Onyń ishinde ormandy alqap alańy – 49,9 myń gektar. Orman órtteriniń 55%-y naızaǵaıdan boldy. 12 jaǵdaıda – turǵyndar, 9 oqıǵaǵa kásiporyndar men uıymdar kináli. Qalǵandary anyqtalmaǵan sebepterden týyndady», - dep túıindedi vedomstvo basshysy.

Onyń aıtýynsha, taıada elimizdegi erekshe qorǵalatyn tabıǵı aýmaqtarda órtti erte anyqtaý júıesi engizilmek.