Orman órtiniń aldyn alýǵa 33 mlrd teńgeden astam qarjy jumsaldy
ASTANA. KAZINFORM – «Taza Qazaqstan» ekologııalyq bastamasy aıasynda «Jasyl damý» AQ 2024 jyldan beri memlekettik ulttyq tabıǵı parkterdi, orman rezervattaryn, qoryqtar men orman sharýashylyǵy mekemelerin arnaıy tehnıkamen qamtamasyz etýge 33,1 mlrd teńgeden astam qarajat bóldi. Bul týraly Ekologııa jáne tabıǵı resýrstar mınıstrligi habarlady.
Vedomstvonyń málimetinshe, qarjy kádege jaratý tólemderi esebinen bólingen. Osy ýaqyt ishinde orman jáne dala órtteriniń aldyn alý men olardy jedel sóndirýge arnalǵan 1 006 birlik zamanaýı arnaıy tehnıka satyp alynǵan.
Olardyń qatarynda órt sóndirý avtotsısternalary, jol talǵamaıtyn kólikter, túrli úlgidegi traktorlar jáne orman qory men erekshe qorǵalatyn tabıǵı aýmaqtardy qorǵaýǵa qajetti ózge de arnaıy tehnıkalar bar.
«Tabıǵat qorǵaý mekemeleriniń materıaldyq-tehnıkalyq bazasyn jańartý olardyń órt qaýpi joǵary kezeńge daıyndyǵyn arttyrýǵa, órt oshaqtaryna den qoıý ýaqytyn qysqartýǵa jáne tabıǵı órttermen kúrestiń tıimdiligin arttyrýǵa baǵyttalǵan», – delingen mınıstrlik habarlamasynda.
Qarjylandyrýdyń eń joǵary kólemi Shyǵys Qazaqstan (5,05 mlrd teńge, 148 tehnıka), Aqmola (4,94 mlrd teńge, 160 tehnıka), Pavlodar (4,44 mlrd teńge, 136 tehnıka), Qostanaı (4,10 mlrd teńge, 112 tehnıka), Abaı (3,34 mlrd teńge, 82 tehnıka) jáne Soltústik Qazaqstan (3,31 mlrd teńge, 107 tehnıka) oblystaryna baǵyttalǵan.
Qazirgi tańda jetkizilgen tehnıkalar elimizdiń barlyq óńirindegi tabıǵat qorǵaý mekemelerinde paıdalanylyp jatyr. Olar órt sóndirý bólimshelerin jedel jetkizýge, aýmaqtardy patrýldeýge, orman órtteriniń aldyn alý jáne olardy sóndirý jumystaryn tıimdi júrgizýge múmkindik beredi.
«Jasyl damý» AQ kádege jaratý tólemderi esebinen elimizdiń ekologııalyq qaýipsizdigin nyǵaıtýǵa, orman ekojúıelerin saqtaýǵa jáne erekshe qorǵalatyn tabıǵı aýmaqtardy qorǵaý tıimdiligin arttyrýǵa baǵyttalǵan ekologııalyq jobalardy iske asyrýdy jalǵastyryp keledi», – dep málimdedi mınıstrlik.
Aıta keteıik, keshe respýblıka aýmaǵyndaǵy orman qorynda 5 órt tirkeldi.
