Orman órtine baılanysty Reseıdiń 4 óńirinde tótenshe jaǵdaı jarııalandy

MÁSKEÝ.Kazinform - ıAkýtııada orman órti 8,4 myń gektardan astam aýmaqta sóndirilýde. Bul týraly atalǵan óńirdiń Ekologııa mınıstrligi habarlady, dep jazady agenttik tilshisi.

Habarlamada aıtylǵandaı, táýlik basynda Verhoıan, Gornyı, Jıgan, Kobıaı, Lensk, Mırnyı, Olekmın, Olenek, Sýntar, Srednekolym, Tatta, Ýst-Aldan jáne Chýrapcha aýdandarynyń aýmaqtarynda jalpy 8,402 myń gektardy qamtıtyn 24 orman órti tirkelgen. Órt sóndirýge 520 adam jáne 24 tehnıka jumyldyrylǵan.

Mırnyı aýdanynda ormandarda tótenshe jaǵdaı rejımi engizildi. Al Verhoıan, Olekmın, Chýrapcha, Eveno-Bytantaı aýdandarynda jáne Jataı qalalyq okrýginde erekshe órtke qarsy rejımder kúshinde.

Aıta keteıik, ıAkýtııa Reseı Federatsııasyndaǵy eń órt qaýpi joǵary óńirlerdiń biri bolyp tabylady. «Avıalesoohrana» derekterine sáıkes, 2024 jyly respýblıka aýmaǵyndaǵy tabıǵı órtterdiń jalpy kólemi shamamen 3,25 mln gektardy quraǵan.

Sonymen qatar, «Avıalesoohrana» telegram-arnasynda habarlanǵandaı, ótken táýlikte Reseıdiń 9 óńirinde 18 orman órti sóndirildi. 7 óńirde 37 orman órtin sóndirý jumystary júrgizilýde.

Órt sóndirýge 1 406 adam, 114 tehnıka, 17 áýe kemesi qatysqan. Orman órtterine áýe arqyly monıtorıng júrgizý úshin 78 áýe kemesi tartyldy.

Tyva Respýblıkasyndaǵy orman órtterin turaqtandyrýǵa «Avıalesoohrana» federaldyq mekemesiniń 249 qyzmetkeri kómek kórsetýde.

Reseıdiń 4 óńirinde tótenshe jaǵdaı rejımi, 58 óńirinde erekshe órtke qarsy rejım, al 87 óńirinde órt qaýipti maýsym engizilgen.

Aıta keteıik, Orman órtteriniń saldarynan Eýropa Kıpr aýmaǵyndaı jerinen aıyryldy.