Orman órtin erte anyqtaý júıesine JI tehnologııalary engizilip jatyr
ASTANA. KAZINFORM – Monıtorıng jáne jasandy ıntellektiniń ozyq tehnologııalaryn engizý elimizde aýqymdy orman órtteriniń táýekelderin barynsha azaıtýǵa múmkindik beredi.
Jobany júzege asyrý barysy jáne órtti erte anyqtaý júıesiniń aýqymy týraly ekologııa jáne tabıǵı resýrstar vıtse-mınıstri Nurlan Qurmalaev habarlady.
Onyń aıtýynsha, «Semeı ormany» memlekettik tabıǵı rezervatynda 37 keshennen turatyn jeli qurylǵan. Olardyń árqaısysy antenna-dińgekten, mýltıspektrli kameradan, beınekadrlardy taratýǵa arnalǵan radıorelelik modýlden jáne derbes energııa blogynan turady. Júıe jasandy ıntellektimen biriktirilgen, ol naqty ýaqyt rejıminde tútindi anyqtap, sıgnaldy jedel basqarý ortalyǵyna jiberedi.
— Júıeniń negizgi máni — jedel áreket etip, órt oshaqtaryn oqshaýlaý jáne joıý úshin orman órtterin erte anyqtaý. Bul tájirıbe búginde Prezıdent tapsyrmasyna oraı keń aýqymda taratylýda. Ol boıynsha birinshi kezeń aıaqtaldy, onda Aqmola oblysynyń bes orman sharýashylyǵy, Naýyrzym qoryǵy jáne Astana qalasynyń mańynda ornalasqan jasyl aımaq qamtylǵan. Ekinshi kezeń Іle-Alataý, Kólsaı kólderi, Saıram-Ógem, Baıanaýyl, Qarqara jáne Býrabaı taýly jerlerinde júzege aspaq. Úshinshi kezeń — Shyǵys Qazaqstan oblysyndaǵy 10 orman sharýashylyǵy men ulttyq park, — dep atap ótti Nurlan Qurmalaev.
Qazaqstannyń avıatsııany qoldana otyryp, orman órtin anyqtaý jáne sóndirý salasyndaǵy biregeı tájirıbesi álemniń damyǵan elderi standarttaryna sáıkes keledi. Qyzmettiń tehnıkalyq áleýeti men kadrlyq qamtamasyz etilýi týraly «Qazavıaormanqorǵaý» RMQK bas dırektorynyń orynbasary Igor Aboev málimdedi.
Onyń aıtýynsha, búginde kásiporyn shtatynda 302 qyzmetker bar. Ujymnyń negizgi bóligin desantshy-órt sóndirýshiler, qoljetimdiligi qıyn orman alqaptaryna qoný ádisin qoldana otyryp, órt oshaqtaryn tikeleı sóndirý jumystaryn júrgizetin joǵary bilikti mamandar quraıdy.
— Bizdiń «Qazavıaormanqorǵaý» — álemniń barlyq elinde kezdese bermeıtin biregeı kásioryn. Mundaı qurylym AQSh, Kanada, Ońtústik Koreıa, Túrkııa, Reseı sııaqty damyǵan elderde jáne Qazaqstanda ǵana bar. Kásiporyn avıatsııany qoldana otyryp, orman órtterin anyqtaý jáne sóndirýmen aınalysady, — dep atap ótti Igor Aboev.
Aıta ketelik Bektenov Abaı oblysyndaǵy «Semeı ormany» rezervatynda órtke qarsy tsıfrlyq júıeni teksergen edi.
