Orman órti: evakýatsııalanǵan qostanaılyqtar úılerine oraldy
ASTANA. QazAqparat - Qostanaı oblysynda orman órti saldarynan qaýipsiz jerge kóshirilgen adamdar úılerine oraldy, dep habarlady QazAqparatqa QR ІІM Tótenshe jaǵdaılar komıtetiniń resmı ókili Rýslan Imanqulov.
«20 qyrkúıek kúni saǵat 17.11-de orman sharýashylyǵy qyzmetkerlerinen túsken aqparatqa sáıkes, saǵat 16.35-te Qostanaı oblysynyń Uzynkól aýdanynda «Uzynkól orman sharýashylyǵy mekemesiniń» Obaǵan orman sharýashylyǵy aýmaǵynda qylqan aǵashty orman alqaby jana bastaǵany belgili boldy. Jergilikti atqarýshy organdar órt aýmaǵynan 7 shaqyrym jerde ornalasqan Berezovo aýylynan Tasoǵan aýylynyń orta mektebine 15 turǵyndy evakýatsııalady. Órttiń taralýy saǵat 21.05-te toqtatyldy. Aldyn ala aqparat boıynsha, jalyn 40 gektar aýmaqty sharpydy», - dep habarlady resmı ókil.
Málim etilgendeı, qaýipsiz jerge kóshirilgen aýyl turǵyndary úılerine oraldy. Qurbandar men zardap shekkender joq.
Tilsiz jaýmen kúresti Qostanaı oblysy Órtke qarsy qyzmetiniń qyzmetkerleri men orman sharýashylyǵynyń mamandary jalǵastyrýda.
