Orman órtenip jatqan Antalııada nóser jańbyr jaýdy

ANTALIıA. Anadoly-QazAqparat – Túrkııanyń ońtústiginde biraz ýaqytqa sozylǵan aptap ystyqtan keıin nóser jaýyn jaýdy, dep habarlaıdy QazAqparat tilshisi Anadoly agenttigine silteme jasap.

Búgin tańerteńnen beri Antalııanyń keı aýdandarynda jańbyr jaýyp ótti. Qala kósheleri men provıntsııanyń jan-jaǵyn sý alyp ketti.

Uzaqqa sozylǵan ystyq pen qýańshylyqtan keıin qala turǵyndary tańǵy nóserge daıyn emes edi, sondyqtan tańerteń jumysqa bara jatyp, jaýyn astynda qalǵan halyq aıaldamalardy panalaýǵa májbúr boldy.

Bir jaqsysy, bul jańbyr orman órti jalǵasyp jatqan aımaqtarda jaýdy. Órtten ábden qaljyrap, boıyn úreı jaılaǵan halyq jaýynǵa kerisinshe qýandy.

Túrik meteorologtarynyń aıtýynsha, óńirde aýa raıy bultty, taǵy nóser jaýýy yqtımal.

Keshke qaraı Manavgat, Gúndoǵmýsh jáne Alanııa aýdandarynda jańbyr bolýy múmkin.

Erteńnen bastap aýa temperatýrasy qaıtadan 38 gradýstan joǵary kóteriledi.

Eske sala keteıik, Túrkııada bir aptadan astam ýaqyttan beri orman órtin sóndirý jalǵasyp jatyr.