Orman órt sóndirý stansalaryn TJM qaramaǵyna bergen jón – sarapshy
Mamanǵa «órttiń aldyn alý jáne onyń órshýine jol bermeýge múmkindik boldy ma?» degen saýal qoıyldy.
«Oqıǵa ornynda bolmaǵandyqtan naqty eshteńe aıta almaımyn. Biraq, tájirıbege súıene otyryp, orman sharýashylyqtary, rezervattar men tótenshe jaǵdaılar kúshteriniń ýaqtyly habardar etilmeýi jáne ózara árekettese almaýy órttiń órshı túsýine alyp keledi. Sebebi orman órtiniń aýmaǵy 25 ga nemese odan da kólemdi bolǵan kezde tótenshe jaǵdaı jarııalanady. Tótenshe jaǵdaı jarııalanǵan kezde tilsiz jaý 2-3 gektar jerden bastaý alyp, 100 gektarǵa jetken, ol qalaı? Bul jerde ózara is-qımyl jáne júıeli sharalar qajet», - dedi ıÝzan Táńirbergenov efır barysynda.
Sonymen qatar, orman sharýashylyǵy mamany salaǵa ózgerister boıynsha óz usynysyn aıtty.
«Orman órtterin sóndirý boıynsha biz Eýropa, onyń ishinde Germanııaǵa baryp tájirıbe almastyq. Olarda ormanshylar orman órtin sóndirýmen aınalyspaıdy, olar tek esep beredi, al órtti kásibı mamandar sóndiredi. Bizde ormanshylar ámbebap - órtti ózderi sóndiredi, aǵashty ózderi otyrǵyzyp, kútip baptaıdy, sonymen qatar ormandy saqtaýǵa jaýapty. Bul júıeni ózgertý kerek. Men orman órt sóndirý stansalaryn (leshozdardy) shtatpen, tehnıka birlikterimen birge tótenshe jaǵdaılar qyzmetine berýdi usyndym. Ormanshylar aǵash otyrǵyzý, olardy baptaý jáne qorǵap-saqtaýmen aınalyssyn»,- deıdi ol.
Odan bólek, sarapshy Semeı rezervatyndaǵy órttiń zalaly men ony qaıta qalpyna keltirýge qatysty pikirin alǵa tartty.
«Búginde ormannyń 60 myń gektary órtenip ketti. Eger jyl saıyn 1,5 - 2 myń gektar jerge aǵash otyrǵyzǵannyń ózinde ony qalpyna keltirýge kem degende 30 jyl kerek. Biraq qazir órttiń aýmaǵy odan saıyn artyp jatyr. Orman burynǵy qalpyna kelip, tolyq qalyptasýy úshin 50-60 jyl qajet», - dedi ıÝzan Táńirbergenov Jibek Joly telearnasynyń efırinde.
