Orman men ulttyq parkterdi órtten qorǵaýǵa 16,9 mlrd teńge baǵyttaldy
ASTANA. KAZINFORM — «Jasyl damý» AQ orman órtterinen qorǵaýdy kúsheıtýge 16,9 mlrd teńge bóldi, dep habarlaıdy Ekologııa jáne tabıǵı resýrstar mınıstrliginiń baspasóz qyzmeti.
QR Prezıdentiniń «Taza Qazaqstan» ekologııalyq bastamasy aıasynda jáne Ekologııa jáne tabıǵı resýrstar mınıstrliginiń qoldaýymen «Jasyl damý» AQ-y orman qory, memlekettik tabıǵı aýmaqtar men ulttyq parkterdi órtten qorǵaýdy kúsheıtýge kádege jaratý tólemi qarajaty esebinen qarjy baǵyttady.
— Jobany qarjylandyrýdyń jalpy kólemi 16 916 552 707 teńgeni qurady. Qarajat orman órtterin erte anyqtaýdyń zamanaýı júıelerin engizýge, ushqyshsyz ushý apparattaryn (drondar) satyp alýǵa, beınebaqylaý, baılanys jáne derekterdi berý jabdyqtaryn jańartýǵa, sondaı-aq qajetti ınfraqurylymdy damytýǵa jumsaldy. Bul júıeler baǵdarlamalyq jáne tehnıkalyq sheshimderdi biriktirip, qorǵalatyn aýmaqtardy táýlik boıy baqylaýǵa jáne órt belgileri anyqtalǵan jaǵdaıda aqparatty jedel jetkizýge múmkindik beredi, — delingen habarlamada.
Mınıstrlik atap ótkendeı, atalǵan joba Qazaqstan úshin erekshe mańyzǵa ıe. Sebebi elimizdegi orman alqaptarynyń úlesi salystyrmaly túrde az, al olardy qalpyna keltirý ondaǵan jyldardy talap etedi. Sondyqtan órt oshaqtaryn erte anyqtaý jáne jedel áreket etý tabıǵı baılyqty saqtaýdyń negizgi sharttarynyń biri sanalady.
Joba aıasynda óńirlerge EAJ-1 orman órtterin erte anyqtaý júıesiniń 14 kesheni jetkizildi.
Qarjylandyrý óńirler boıynsha tómendegideı bólindi:
Aqmola oblysy — 4 838 441 450 teńge;
Qostanaı oblysy — 1 354 086 800 teńge;
Qaraǵandy oblysy — 3 043 492 747 teńge;
Pavlodar oblysy — 1 045 995 589 teńge;
Almaty oblysy — 3 337 277 304 teńge;
Túrkistan oblysy — 1 661 830 639 teńge;
Shyǵys Qazaqstan oblysy — 1 635 428 178 teńge.
— EAJ-1 — qorǵalatyn aýmaqta órttiń alǵashqy belgilerin avtomatty túrde anyqtaýǵa múmkindik beretin baǵdarlamalyq-apparattyq keshen. Júıe táýlik boıy jumys istep, tútindi, janý ónimderin, temperatýranyń kóterilýin, sondaı-aq jalynnyń ınfraqyzyl jáne ýltrakúlgin sáýlelenýin tirkeıdi. Qaýip rastalǵan jaǵdaıda aqparat jedel túrde dıspetcherlik pýnktke nemese órtke qarsy qyzmetke jiberiledi. Bul áreket etý ýaqytyn qysqartyp, órttiń keń taralýynyń aldyn alýǵa múmkindik beredi, — deıdi mamandar.
Jekelegen nysandarda táýlik boıy jumys isteıtin sholý buryshy keń avtomattandyrylǵan beınekameralar qoldanylyp jatyr. Mundaı tehnologııalar órtti kózge anyq baıqalmaı turyp-aq, bastapqy kezeńinde anyqtaýǵa múmkindik beredi.
Órtti erte anyqtaý júıelerin engizý, ushqyshsyz ushý apparattaryn paıdalaný jáne zamanaýı baılanys quraldaryn qoldaný orman qory men erekshe qorǵalatyn tabıǵı aýmaqtardy qorǵaýdyń tıimdiligin arttyrady. Bul tásil órtke jedel áreket etýge ǵana emes, profılaktıkalyq jumystardy kúsheıtýge, adamdar úshin týyndaıtyn qaýip-qaterdi azaıtýǵa, ekologııalyq jáne materıaldyq shyǵyndardy barynsha tómendetýge múmkindik beredi.
Aıta keteıik, jobany iske asyrý Qazaqstannyń tabıǵı aýmaqtaryndaǵy órt qaýipsizdigi deńgeıin arttyrýǵa jáne ormandardy tótenshe jaǵdaılardan qorǵaýdyń turaqty ári tıimdi júıesin qalyptastyrýǵa baǵyttalǵan.
Buǵan deıin keshe elimizde 10 orman órti tirkelgenin jazǵanbyz.
