Orman mekemelerindegi tehnıkanyń 55 paıyzy tabıǵı órtti sóndirýge qaýqarly emes - TJM

ASTANA. QazAqparat – Orman mekemelerindegi tehnıkanyń 55 paıyzy tabıǵı órtterdi sóndirýge daıyn emes. Bul týraly Úkimet otyrysynda Tótenshe jaǵdaılar birinshi vıtse-mınıstri Ibragım Kúlshimbaev aıtty, dep habarlaıdy QazAqparat tilshisi.

«Búgingi tańda óńirler profılaktıkalyq is-sharalaryn iske asyrýǵa kiristi. Órtke qarsy qyzmetkerler sharýa qojalyqtaryn aralap, nusqama ótkizip, ulttyq parkter men tabıǵı qoryqtardy jáne órt sóndirý quraldaryn tekserip, aldyn alý sharalaryn túsindirdi. Ekologııa jáne tabıǵı resýrstar mınıstrligimen birlesip, múddeli memlekettik organdarmen kelisilgen arnaıy vedomstvoaralyq jospar bekitildi. Ǵaryshtyq monıtorıngti qamtamasyz etý maqsatynda barlyq óńirde «Qazaqstan ǵarysh saparymen» shart jasaldy», - dedi birinshi vıtse-mınıstr.

Onyń atap ótýinshe, ózara is-qımyl máselelerin pysyqtaý úshin Reseı jáne Qyrǵyzstan TJM bólimshelerimen shekara mańynda 10 órt-taktıkalyq oqý-jattyǵý ótkizý josparlanǵan.

«Qabyldanyp jatqan is-sharalarǵa qaramastan qazir óńirlerdiń orman sharýashylyǵy mekemeleriniń tolyq ázirligi týraly aıta almaımyz. Jalpy avtotsısternamen, órt stansalarymen, munaramen, sorǵylarmen jaraqtandyrý deńgeıi jetkiliksiz bolyp otyr. Budan basqa, orman mekemelerindegi qolda bar tehnıkanyń 55 paıyzynyń paıdalaný resýrsy tozǵan, sol sebepti tabıǵı órtterdi sóndirýge daıyn emes. Keı óńirlerde tabıǵatty qorǵaý jáne orman mekemeleriniń jabdyqtalýy 50 paıyzdan aspaıdy», - dedi Ibragım Kúlshimbaev.