Orman qoryna keltirilgen zalaldy órt tolyqtaı sóndirilgen soń esepteımiz – Abaı oblysynyń ákimi

ASTANA. QazAqparat - Abaı oblysynyń ákimi Nurlan Uranhaev Borodýlıha aýdanyndaǵy orman alqabynyń aýmaǵyn tikushaqpen ushyp ótti, onda jekelegen órt oshaqtaryn sóndirý jumystary jalǵasýda.

Abaı oblysy ákimdiginiń habarlaýynsha, óńir basshysy jedel shtabta kóshpeli keńes ótkizip, TJD basshysy Manarbek Shapaǵatov pen oblys ákiminiń orynbasary Dımıtrıı Garıkovtyń esepterin tyńdady.

«Mamandar jergilikti jerlerde kezekshilik etedi. Órtti sóndirý jumystary barlyq jerde júrgizilip jatyr. Basty mindet - eldi mekenderge jalyndy taratpaı tezirek sóndirý. Ol úshin jedel shtab táýlik boıy jumys isteıdi. Orman qoryna keltirilgen zalaldy órt tolyqtaı sóndirilgen soń esepteımiz, - dedi oblys ákimi Nurlan Uranhaev.

Aıta keteıik, qazirgi ýaqytta órtti sóndirý 3 ýchaskede jalǵasýda. Órttiń taralýy tolyǵymen toqtatyldy.

Jeldiń kúsheıýine baılanysty tuzdy kól aýdanyndaǵy 3-ýchaskede órt tómennen joǵaryǵa aýysty. Órtti sóndirý úshin 20 tehnıka jumyldyryldy. Órt taralmas úshin shetinen jer jyrtylǵan.

Osyǵan deıin Abaı oblysyndaǵy órttiń birneshe óńirge qaýip tóndirgenin jazǵan bolatynbyz.