Orman qoryn turaqtandyrý úshin zańnamany qataıtý kerek - depýtat J. Dúısebaev
ASTANA. 10 mamyr. QazAqparat - Elimizdegi orman qoryn turaqtandyryp, ony qorǵaý sharalaryn arttyrý úshin osy saladaǵy zańnamaǵa jaýapkershilikti qataıtý normalary engizilýi kerek.
Búgin Parlament Májilisiniń jalpy otyrysynda Úkimet basshysynyń atyna saýal joldaǵan depýtat Jeksenbaı Dúısebaev osy máseleni kóterdi.
Depýtattyń aıtýynsha, elimizdegi orman qorynyń jalpy aýmaǵy 28,7 mln. gektardy quraıdy. Bul el aýmaǵynyń 10,5 paıyzyn alady. Onyń ishinde ormanmen kómkerilgen óńirler 10,3 mln. gektardy alyp, orman qorynyń 43 paıyzyn qurap otyr. Degenmen, depýtat J. Dúısebaev sońǵy jyldary atqarylǵan sharalarǵa qaramastan, orman jáne ań sharýashylyǵy salasynda sheshýdi qajet etetin birqatar problemalar baıqalatynyn alǵa tartady.
«Máselen, orman órtterinen bolatyn shyǵyndardan qorshaǵan ortaǵa, ekonomıkaǵa kóp zalal kelýde. Byltyrǵy jyly orman órtiniń 644 oqıǵasy tirkelipti. Sonyń saldarynan 11,7 myń gektar orman alqabynan aıyryldyq. Osy jylǵy tórt aıdyń ishinde de birqatar orman órti qaıtalanyp otyr. ıAǵnı, orman órti jyl saıyn qaıtalanatyn ádetke aınalyp bara jatqan sekildi. Budan bólek, qatań talaptyń joqtyǵynan zańsyz aǵash kesýler de jalǵasýda. Tek qana 2010 jyly onyń kólemi 3016 tekshe metrdi quraǵan», - deıdi depýtat.
Sondyqtan da depýtattyń aıtýynsha, orman máselesine qatysty zańnamalardy qataıtý qajet. «Ormandy utymdy paıdalanýǵa tıispiz. Ony turaqtandyrý men orman órtterin, zańsyz aǵash kesýden týatyn azaıýdy boldyrmaıtyn normalardy zańnamaǵa engizýimiz kerek», - deıdi ol.
