Orman qorynyń 2% ǵana órtti erte anyqtaıtyn júıe bar – Úkimet basshysy
ASTANA. KAZINFORM – Memlekettik orman qorynyń 2%-y ǵana orman órtin erte anyqtaý júıesimen qamtylǵan. Bul máseleni QR Premer-Mınıstri Oljas Bektenov kóterdi.
«Býrabaı» ulttyq parki aýmaǵynda qoldanysqa engizilgen smart-júıeniń arqasynda sońǵy jyldary ondaǵy órt oqıǵasy aıtarlyqtaı qysqardy jáne órtke qarsy shuǵyl áreket etý jumystary kúsheıtildi. Bul tájirıbeni basqa da tabıǵı parkter men rezervattarda qoldaný kerek», - dedi O. Bektenov Úkimettiń búgingi otyrysynda.
Ol orman jáne tabıǵatty qorǵaý mekemelerin órt sóndirý tehnıkalarymen jaraqtandyrý qarqyny mardymsyz ekenin atap ótti.
«Biz buǵan ótken jyly kóz jetkizdik. Ushqyshsyz ushatyn apparattardyń tapshylyǵy orman qory men dalany áýeden tolyq tekserýge múmkindik bermeı otyr. Qazaqstanda mundaı apparattardy jasap shyǵaratyn kásiporyndar bar. Zamanaýı tehnıkalar men tabıǵı órtterdi sóndirý quraldardyń bolmaýy qyzyl jalynmen kúreste shuǵyl sharalar qabyldaýǵa kedergi keltiredi. Bul máselelerdiń barlyǵy keshendi sheshimderdi, ortalyq jáne jergilikti memlekettik organdardyń úılesimdi jumysyn talap etedi», - dedi Úkimet basshysy.
Ákimdikter eldi mekenderde órt sóndirý beketteri men órtke qarsy erikti qurylymdardy uıymdastyrý jumystaryn jalǵastyrýy qajet. Sonymen qatar, orman sharýashylyǵy mekemeleri kúndelikti órt sóndirý quraldarymen qamtamasyz etilýge tıis.
«Ekologııa mınıstrligi men atqarýshy organdar buryn bolǵan órtterdiń tájirıbesin eskerip, órt qaýpi joǵary jerlerde qosymsha baqylaý beketterin qoısyn. Tótenshe jaǵdaılar mınıstrligimen jáne ákimdiktermen birlesip, sý kózderi men órt sóndirý toǵandaryn daıyndaý qajet. Tótenshe jaǵdaılar, Ekologııa mınıstrlikteri men ákimdikterge tabıǵı órtterge qarsy shuǵyl áreket etý boıynsha kórshi elderdiń shekara mańyndaǵy aýmaqtarynyń tıisti qyzmetterimen ózara is-qımyldy kúsheıtýdi tapsyramyn», - dedi Premer-Mınıstr.
