Orman qory jerleri aýyl sharýashylyǵy maqsatyndaǵy jerler sanatyna aýystyryla ma — Bektenov jaýaby

ASTANA. KAZINFORM — Premer-mınıstr Oljas Bektenovtiń Senat depýtattarynyń orman qory jerlerin aýyl sharýashylyǵy maqsatyndaǵy jerler sanatyna aýystyrý usynysyna jaýap berdi. 

— 2025 jyldyń sońyndaǵy jaǵdaı boıynsha orman qory jerleriniń jalpy aýdany 23,4 mln gektar (respýblıkanyń jer qorynyń 8,9%-y). Jer reformasy jyldarynda alań, negizinen, buryn aýyl sharýashylyǵy kásiporyndarynyń ýaqytsha paıdalanýynda bolǵan jerlerdi berý esebinen 2,3 esege ulǵaıdy. Orman zańnamasyna sáıkes orman qory jerlerinde ornalasqan jáne orman sharýashylyǵy qajettilikteri úshin paıdalanylmaıtyn aýyl sharýashylyǵy alqaptary jeke jáne zańdy tulǵalarǵa aýyl sharýashylyǵy maqsatynda, sonyń ishinde jaıylym retinde paıdalaný úshin berilýi múmkin, — dedi Premer-mınıstr.

Úkimet basshysynyń dereginshe, qazirgi ýaqytta orman qory jerleriniń shamamen 29,4 paıyzyn aýyl sharýashylyǵy alqaptary alyp jatyr. Budan bólek, bosalqy jerler quramynda 83 mln gektarǵa jýyq jer bar. Onyń ishinde 60,8 mln gektar — jaıylym. Bul aýyl sharýashylyǵyn damytý úshin aıtarlyqtaı rezerv sanalady.

— Jerdi qaıta bólýdi baqylaý jónindegi respýblıkalyq komıssııanyń qyzmeti aıasynda paıdalanylmaıtyn jerlerdi qaıtarý jáne olardy aýyl sharýashylyǵy aınalymyna tartý boıynsha júıeli jumys júrgizilip jatyr. Bul jaıylym tapshylyǵyn azaıtýǵa yqpal etedi. Baıandalǵandy eskere otyryp, orman qory jerlerin aýyl sharýashylyǵy maqsatyndaǵy jerler sanatyna aýystyrý qazirgi kezeńde maqsatqa saı emes, — dedi Oljas Bektenov.

Buǵan deıin Aqmola oblysynyń prokýratýrasy quny 2,2 mlrd teńge bolatyn orman qorynyń jer ýchaskelerin memleketke qaıtarǵan edi.