Orman alqaptaryn órtten qorǵaýǵa qajetti tehnıka jetispeıdi - Aýyl sharýashylyǵy mınıstrligi
ASTANA. Mamyrdyń 5-i. QazAqparat /Aıdar Ospanalıev/ - Elimizdegi orman alqaptaryn órtten qorǵaý sharalarynyń tolyǵymen júzege asyrylýyna kedergi bolyp otyrǵan basty másele - materıaldyq - tehnıkalyq jabdyqtarmen qamtamasyz etý sharalarynyń álsizdigimen baılanysty.
Bul týraly búgin jýrnalıstermen bolǵan baspasóz máslıhatynda Aýyl sharýashylyǵy mınıstrliginiń Orman jáne ańshylyq sharýashylyǵy komıtetiniń tóraǵasy Erlan Nysanbaev málim etti, dep habarlaıdy QazAqparat.
Onyń sózine qaraǵanda, Aýyl sharýashylyǵy mınıstrligine qarasty Orman jáne ańshylyq sharýashylyǵy komıtetinde 59 hımııalyq
órtten qorǵaý stansylary bar. Sondaı-aq komıtette 147 órtten qorǵaý tehnıkasy bar. Buǵan qosa taǵy 180 tirkegishi bar traktorlar men 88 bıikke kóteriletin qurylǵylar bar. «Soǵan qaramastan, bizde órtten qorǵaý tehnıkasy áli de bolsa jetkiliksiz. Bul komıtetke qarasty mekemeler men oǵan jatpaıtyn, ıaǵnı jergilikti atqarýshy organdardyń quzyryndaǵy ujymdarda birdeı qalyptasqan jaǵdaı», dedi komıtet tóraǵasy.
Onyń sózine qaraǵanda, qazir komıtet ókilderi tıisti organdarǵa ótinish jasap, onda 2011 jylǵa qajetti qural-jabdyqtar alýǵa qarjy bólý máselesi qaralýda. «Árıne, qazirgi bar tehnıkamen de qolǵa alynǵan isten bir nátıje shyǵarýǵa bolady. Biraq biz eski tehnıkamen ýaqyttan da, jedeldik jaǵynan da, ónimdilik jaǵynan da utylatynymyz anyq. Búginde ormandy alqaptardy órtten qorǵaýǵa eń kóp qajetti tehnıka shynjyr tabandy traktorlar. Al olardyń sany búgin belgilengen normanyń 30 paıyzyn ǵana quraıdy. Bul tehnıka órtti sóndirýde óte qomaqty jumystar atqarady», dedi E.Nysanbaev.
