Orman alqaptaryn ulǵaıtý jospary qanshalyqty oryndaldy
ASTANA. KAZINFORM — Táýelsizdik jyldarynda respýblıkanyń orman qorynyń aýdany 6,9 mln gektarǵa ulǵaıdy. Bul týraly ekojúıelerdi utymdy paıdalaný taqyrybyndaǵy ornyqty damýy salasyndaǵy mindetterdiń iske asyrylýyn monıtorıngileý jónindegi Parlamenttik komıssııanyń otyrysynda Ekologııa jáne tabıǵı resýrstar mınıstri Erlan Nysanbaev málim etti.
Mınıstrdiń aıtýynsha, BUU-nyń ornyqty damý maqsatyna qol jetkizý aıasynda mınıstrlikke 11 ındıkator bekitilgen. Barlyq kórsetkishter boıynsha ósý baıqalǵan, onyń ishinde taýly orman alqaptary 2015 jylǵy 5,6 mln gektarmen salystyrǵanda, 5,9 mln gektarǵa jetti.
- Táýelsizdik jyldarynda respýblıkanyń orman qorynyń aýdany 6,9 mln gektarǵa (25%) ulǵaıdy. Qazirgi ýaqytta memlekettik orman qorynyń jalpy aýdany 30,9 mln ga (1991 jyly – 24 mln ga), onyń ishinde qalyń orman basqan jerler 13,7 mln ga (1991 jyly – 10,2 mln ga) nemese 44,3% qurady. Bul rette elimizdiń ormandy aýmaǵy 1991 jylǵy 3,8 paıyzdan qazir 5 paıyzǵa deıin jetkizildi, - dedi E. Nysanbaev.
Onyń sózine qaraǵanda, qalyń orman basqan jerdiń aýmaǵyn 13,7 mln gektardan 2030 jylǵa qaraı 14,5 mıllıon gektarǵa deıin ulǵaıtý josparlanǵan. Osy baǵytta Memleket basshysy memlekettik orman qorynda 2 mlrd aǵash otyrǵyzý mindetin qoıdy. 2021 jyldan bastap 736,8 myń gektar aýmaqta 1 mlrd 150 mln aǵash otyrǵyzyldy. Onyń ishinde 2024 jyly 205,2 myń ga aýmaqta 306 mln aǵash egildi.
- Orman alqabyn ulǵaıtý aıasynda tuqym materıaldarymen qamtamasyz etý úshin 114 jańa orman tálimbaǵyn qurý josparlandy, - dedi vedomstvo basshysy.
Budan buryn habarlanǵandaı, Senat tóraǵasy ekojúıeni damytýdaǵy problemany atady.