«Órleý» jobasynyń arqasynda 4 myńǵa tarta otbasy óziniń áleýmettik jaǵdaıyn jaqsartty
ASTANA. QazAqparat - Aqmola, Shyǵys Qazaqstan jáne Jambyl oblystarynda 2014 jylǵy qańtar aıynan iske asyryla bastaǵan «Órleý» qanatqaqty jobasynyń arqasynda 11 aı ishinde 3 843 otbasy nemese 19 909 qazaqstandyq jalpy somasy 413,3 mln. teńge kóleminde shartty aqshalaı kómek (ShAK) aldy. Bir adamǵa shaqqandaǵy ShAK ortasha kólemi 4 488 teńgeni qurady.
«Kómekke ıe bolǵan adamdardyń ishinde ataýly áleýmettik kómek (AÁK) alatyndar úlesi - 9,5%, memlekettik balalar járdemaqysy (MBJ) taǵaıyndalǵandar - 56,1%, alǵash ret habarlasqandar úlesi - 34,4% qurady», delingen QR Densaýlyq saqtaý jáne áleýmettik damý mınıstrligi málimetinde. 2014 jylǵy 1 jeltoqsandaǵy jaǵdaı boıynsha qanatqaqty óńirlerde 2013 jyldyń tıisti kezeńimen salystyrǵanda AÁK alatyndar - 16,2%, MBJ alatyndar - 7,1% azaıdy. Jobany iske asyrýǵa respýblıkalyq bıýdjetten 2014 jyly 500 mln. teńge kóleminde maqsatty aǵymdaǵy transfert bólindi. Mysaly, jobaǵa qatysqan Óskemen qalasynyń turǵyny, kóp balaly Baıǵondar otbasy óziniń materıaldyq jaǵdaıyn eleýli túrde jaqsartty. Bul otbasynda tórt bala - eki mektep oqýshysy jáne mektepke deıingi jastaǵy eki bala bar. Otaǵasy «Órleý» jobasyna qatysý úshin 2014 jylǵy maýsym aıynda Jumyspen qamtý jáne áleýmettik baǵdarlamalar bólimine habarlasqan. Ol kezde otaǵasy jumyssyz, jubaıy úsh jasqa deıingi balany kútý boıynsha demalysta bolǵan. Otbasy memlekettik ataýly kómek alýshy bolyp, jalpy tabys mólsheri 24 924 teńgeni quraǵan. Joba aıasynda otbasyn belsendendirý jóninde áleýmettik kelisim-shart bekitildi. ıAǵnı, usynylǵan jumysqa jáne alatyn ShAK qaramastan, kómek alýshynyń ekonomıkalyq derbestigin nyǵaıtý úshin bir jyl ishinde otbasy tabysy qaıta eseptelmeıdi. Jumyspen qamtý jáne áleýmettik baǵdarlamalar bóliminiń baǵyttaýymen otaǵasy «Mlat» JShS jumysshy bop turyp, jalaqysy 60 myń teńge bop bekitildi. ShAK mólsheri bir adamǵa 7 268 teńge, jalpy otbasyna 43 606 teńgeni qurady. Qarasha aıynda otaǵasynyń jalaqysy ulǵaıtylyp, 97 500 teńgege jetti. Jalpy, joba bastalǵaly beri otbasynyń aılyq tabysy 148 811 teńgeni qurady, onyń ishinde otaǵasynyń jalaqysy - 97 500 teńge, kópbalaly ana retinde jubaıynyń áleýmettik járdemaqysy - 7705, ShAK - 43606 teńge. «Jobaǵa qatysýynyń arqasynda otbasynyń materıaldyq jaǵdaıy eleýli túrde jaqsardy. Kommýnaldyq qyzmetter boıynsha qaryzdary qysqardy»,-delingen habarlamada. Eske sala keteıik, qanatqaqty jobany 2014-2015 jyldary iske asyrý josparlanǵan.
