Órleý" jobasyn júzege asyrýdyń barysy týraly dóńgelek ústel jıyny ótýde
ALMATY. 20 jeltoqsan. QazAqparat /Erlik Erjanuly/ - Búgin Almatyda Qazaqstan Respýblıkasy turǵyndarynyń álsiz toptary arasynda Adam ımmýnotapshylyǵynyń vırýsy (VICh) boıynsha saýyqtyrý baǵdarlamasyn keńeıtý jónindegi "Órleý" jobasyn júzege asyrýdyń barysy týraly dóńgelek ústel jıyny ótip jatyr.
Oǵan qarjy AQTQ men týberkýlezben kúrestiń ǵalamdyq qory arqyly "AQTQ-men kúres pen saýyqtyrýdyń respýblıkalyq ortalyǵy" memlekettik mekemesine aýdarylyp otyr.
"Bul joba 2009-2013 jyldar aralyǵynda 2 kezeń boıynsha júzege asyrylady. Alǵashqysy 2009-2010 jyldardy, ekinshisi 2011-2013 jyldardy qamtıdy. Oǵan Almaty, Qaraǵandy, Shymkent, Semeı jáne Pavlodar qalalary enip otyr. 15-24 jas aralyǵyndaǵy jastar arasynda júrgiziletin bul sharanyń basty maqsaty Adam ımmýnotapshylyǵynyń vırýsy men esirtki tutynýdyń taralýyn azaıtý", - deıdi úkimettik emes PSI korporatsııasynyń Qazaqstandaǵy baǵdarlama dırektory Mıra Saýranbaeva. Onyń aıtýynsha, bul jobaǵa grant túrinde 3 mıllıon dollar qarjy bólingen. Ony júzege asyrý kezinde eriktiler jastar arasynda úgit-nasıhat jumysyn júrgizip, ortalyqtan tegin qeńes alýǵa shaqyrady. Onda psıholog, gınekolog sııaqty kásibı mamandar qyzmet kórsetedi. Sondaı-aq trenıngter ótkizilip, jastardyń bos ýaqytyn tıimdi ótkizý úshin tegin úıirmeler uıymdastyrylady. Ol qazirdiń ózinde óz nátıjesin berýde. Ony jergilikti atqarý organdarynyń resmı mamandary da rastap otyr. Máselen Almaty qalasy Áýezov aýdanynda jastar arasyndaǵy qylmys kórsetkishi qazirgi tańda tómendep kele jatyr.
