«Órleý» baǵdarlamasy aıasynda qandaı salalar qarjylandyrylady

ASTANA. KAZINFORM — Kelesi jyly «Órleý» jeńildikti qarjylandyrý baǵdarlamasy keńeıtiledi. Bul týraly búgin Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın aıtty.

— Orta bıznesti damytýdy yntalandyrý, sondaı-aq bankterdiń erkin ótimdiligin ekonomıkaǵa tartý maqsatynda bıyl sáýir aıynan bastap «Órleý» jeńildikti qarjylandyrýdyń jańa baǵdarlamasy iske qosyldy. «Órleý» baǵdarlamasy aıasynda qarjylandyrý qosa qarjylandyrý sharttarymen bankterdiń jáne «Damý» qorynyń óz qarajaty esebinen júzege asyrylady. Bul rette bankter belgileıtin marja 2 paıyzdyq tarmaqtan, al túpkilikti qaryz alýshy úshin syıaqy mólsherlemesi 12,6%-dan aspaıdy. Qaryzdyń eń joǵary somasy — ınvestıtsııaǵa 7 mlrd teńgege deıin, aınalym qarajatyn tolyqtyrý — 3,5 mlrd teńgege deıin, — dedi Serik Jumanǵarın.

Vıtse-premerdiń aıtýynsha, baǵdarlamanyń maqsaty — óndiristi keńeıtý, jumyspen qamtýdy arttyrý, tehnologııalyq jańartý jáne ekonomıkany ártaraptandyrý úshin qolaıly jaǵdaılar jasaý. Qarjylandyrý negizinen óńdeý ónerkásibi, agroóńdeý, logıstıka, bilim berý, densaýlyq saqtaý jáne basqa basym salalarǵa baǵyttalady.

— «Órleý» baǵdarlamasyn iske asyrý kezeńinde 505 mlrd teńgege jýyq kredıt somasyna 1800-den astam jobaǵa qoldaý kórsetildi. Kelesi jyly baǵdarlamany keńeıtý máselesi qaralady. Alaıda búgingi kúni «Órleý» qatysýshylarynyń lızıng boıynsha baǵdarlamany paıdalaný múmkindigi bar, — dedi ol.

Buǵan deıin «Іsker aımaq» baǵdarlamasy qandaı baǵyttarda iske asyrylatynyn jazǵan edik.