«ÓRLEÝ AQPARATY» ınnovatsııalyq taqyrybyndaǵy úzdik jýrnalıstik materıalǵa baıqaý ótkiziledi

ASTANA. 19 qyrkúıek. QazAqparat - QR Indýstrııa jáne jańa tehnologııalar mınıstrliginiń qoldaýymen Tehnologııalyq qoldaý agenttigi «ÓRLEÝ AQPARATY» ınnovatsııalyq taqyrybyndaǵy úzdik jýrnalıstik materıalǵa baıqaý jarııalady. Bul týraly agenttiktiń baspasóz qyzmeti habarlady.

Baıqaýdyń maqsaty - buqaralyq aqparat quraldaryn ınnovatsııany taratýǵa tartý jáne BAQ-ta ınnovatsııalyq taqyrypqa arnalǵan materıaldardyń sapasyn arttyrý.

Oǵan qatysýǵa BAQ-tyń barlyq túrleri - baspa basylymdary, elektrondyq BAQ, televıdenıe men radıo shaqyrylady. Barlyq materıaldar ınnovatsııalyq taqyrypqa arnalýy tıis - aqparattarda Qazaqstandaǵy ulttyq ınnovatsııalyq júıeniń jaı-kúıi jáne damý perspektıvalary, ınnovatsııalardy engizý máseleleri baıypty jazylýy shart. Qazaq jáne orys tilderindegi materıaldar qabyldanady.

Bir jeńimpazǵa 1 000 000 teńge kóleminde Gran-prı tapsyrylady. Baıqaýdyń jalpy júlde qory - 2,6 mln.teńge. Sondaı-aq atalymdar boıynsha jeńimpazdar kózdelgen, árbir atalymda qazaq jáne orys tilderindegi materıaldar bolýy tıis. Mynadaı atalymdar bar: «Úzdik televızııalyq sıýjet/baǵdarlama», «Baspa basylymyndaǵy úzdik jarııalanym», «Úzdik radıobaǵdarlama/radıoreportaj», «Úzdik ınternet materıaly/Fotoreportaj». Sondaı-aq bıylǵy jyly «Úzdik ınnovatsııalyq taqyryptaǵy bloger» jańa atalymy qosyldy.

Baıqaý qorytyndysy aǵymdaǵy jylǵy qazan aıynda saltanatty túrde QR Premer-Mınıstriniń orynbasary - Indýstrııa jáne jańa tehnologııalar mınıstri Áset Isekeshevtiń qatysýymen shyǵarylady.

Qatysýǵa ótinimder 2013 jylǵy 1 qazanǵa deıin qabyldanady. Baıqaýdy ótkizý týraly qosymsha aqparat, ótinimder nysany, sondaı-aq basqa da paıdaly aqparat agenttiktiń www.natd.gov.kz saıtynda kórsetilgen.