«Órleý aqparaty» atty respýblıkalyq ınnovatsııalyq taqyrypta jýrnalısttik baıqaý ótedi

ALMATY. 2 Qarasha. QazAqparat /Názıra Eleýhan/ - QR Indýstrııa jáne jańa tehnologııalar mınıstrliginiń qoldaýymen «Ulttyq ınnovatsııalyq qor» AQ «Órleý aqparaty» atty respýblıkalyq ınnovatsııalyq taqyrypta jýrnalısttik shyǵarmalar baıqaýyna ótinishter qabyldaıtynyn habarlady.

Baıqaýǵa baspasóz, telearna, radıo jáne veb-quraldarymen qosa barlyq BAQ túrleri shaqyrylǵan. Sonymen qatar baıqaýǵa táýelsiz tilshiler, ónerpaz jastar, ınnovatsııa salasyndaǵy ǵalymdar men sarapshylar qatysa alady.

Baıqaýǵa Qazaqstan Respýblıkasynyń Údemeli ındýstrııalyq-ınnovatsııalyq damýynyń 2010-2014 jyldarǵa arnalǵan memlekettik baǵdarlamasy bastalǵan kúninen (19.03.2010) bastap qazaq jáne orys tilinde BAQ oryndarynda buryn jarııalanǵan, ne kórsetilgen materıaldar qabyldanady. Merzimdi basylymdar avtorlary úshin ınnovatsııalyq taqyryptaǵy «50.kz» arnaýly jýrnalynda shyǵarmasyn qosymsha jarııalaýǵa múmkindikteri bar deıdi uıymdastyrýshylar. Maqalalar [e-mail] elektrondyq adresi boıynsha qabyldanady.

Baıqaý nátıjeleri men jeńimpazdardy marapattaý rásimi bıylǵy jyldyń jeltoqsan aıynda ótedi. Ár jeńimpazǵa 300 000 teńge kóleminde qarjylaı syılyq taǵaıyndalǵan. Sonymen qatar ınnovatsııa máselelerin eń belsendi kóteretin BAQ redaktsııasyna arnaýly júlde berilmek. Ótinishter aǵymdaǵy jylǵy 24 qarashaǵa deıin qabyldanady.

Jeńimpazdar "Kreatıvti ustanym", "Syndarly syn", "Saraptamalyq kózqaras", "Jas qalam", "Taqyrypqa adaldyǵy úshin", "Bedeldi pikir" atalymdary boıynsha anyqtalatyn bolady.