Órkenniń týystary sot sheshimine razy emes
ALMATY. QazAqparat - Búgin Qaskeleńde 11 jasar Órken Azamatulynyń ólimine qatysty sot úkimi shyqty. Balanyń ógeı sheshesi Shárıpa Aqberdıeva 25 jylǵa bas bostandyǵynan aırylǵan bolatyn. Alaıda, balanyń týysqandary sot sheshimne narazylyǵyn bildirdi, dep habarlaıdy QazAqparat tilshisi.
«Sot sheshimi ádil emes. Temirdi ómir boıy bas bostandyǵynan aıyrý kerek edi. Ol kámeletke tolǵan, aqyl esi bar, bilip turyp bardy bul iske. Al Qadyrjannyń jasy kámeletke tolmaǵan sol úshin oǵan 12 jyl», - dedi Órkenniń anasy Aıjan Qydyrmoldanova.
Qorǵaýshy Aıman Omarova sottalýshylardyń qoǵam úshin qaýipti ekendigin, jazasyn óteýge berilgen ýaqytta olardyń túzele qoıatynyna kúmán keltirdi.
«Sot úkimine kóńilimiz tolady. 25 jyl áıel adamǵa maksımaldy merzim. Tek Temirge 23 jyldan kóbirek berý kerek edi. Bul 5-ýi jabylyp 11-degi balany op-ońaı óltirse, erteń olardyń túzeletinine kúmán bar», - dedi A.Omarova.
Ázirge Shárıpa Aqberdıevanyń qorǵaýshylary is úkimimen tolyq kelispeıinshe, apellıatsııalyq shaǵym túsire qoımaıtynyn aıtty.
Al, sottalýshy taraptyń týysqandary bolsa apellıatsııalyq shaǵym berýge umtylys bildirip otyr.
Esterińizge sala ketsek, Órken Azamatulynyń joǵalyp ketkendigi týraly onyń ájesi polıtsııaǵa 19 qańtarda shaǵym túsirgen. Keıin balanyń denesi Naýryzbaı aýdanyndaǵy saıajaılardyń birinen tabyldy. Jedel izdestirý sharasynan keıin qylmysqa qatysy bar degen 5 adam 21 qańtarda qolǵa tústi. Resmı ókildiń málimdeýinshe, bul isti marqumnyń ógeı anasy sybaılastarymen birge josparlapty.
