«Órkenıettiń damý joly báribir atomdy ıgerýge aparady...» - respýblıkalyq basylymdarǵa sholý
***
«Premer-Mınıstr Kárim Másimovtiń tóraǵalyǵymen ótken keshegi Úkimet otyrysynda mańyzdy úsh másele qaraldy. Onyń birinshisi elimizdegi bilim berýdi damytýdyń 2011-2020 jyldarǵa arnalǵan memlekettik baǵdarlamasy boldy», - dep jazady «Egemen Qazaqstan» gazeti. Basylymnyń atap ótýinshe, osy baǵdarlamany iske asyrýdyń 2011-2015 jyldarǵa arnalǵan is-sharalar josparynyń bekitilgen. Olardy júzege asyrýǵa qosymsha 461,1 mıllıard teńge qarjy bólý kózdeledi. Al «Salamatty Qazaqstan» dep atalatyn baǵdarlama aıasynda el halqynyń 40 paıyzdaıy aýyldy jerlerde turatyny eskerile otyryp, olarǵa medıtsınalyq kómektiń qol jetimdiligine erekshe kóńil bólinýde. Qazirdiń ózinde osy maqsatta óńirlerge 11 jyljymaly medıtsınalyq keshender jetkizildi. Jyl sońyna deıin olardyń sany 50-ge deıin arttyrylady. Osy jáne «Jumyspen qamtý - 2020» baǵdarlamasy jaıynda tereńirek bilgińiz kelse, «Halyqtyń ómir sapasyn jaqsartý san túrli baǵytpen alǵa baspaq» degen maqalaǵa nazar aýdaryńyz.
«Egemen Qazaqstan» gazetiniń jazýynsha, keshe Memlekettik hatshy-Syrtqy ister mınıstri Qanat Saýdabaev elimizde tirkelgen birqatar sheteldik elshilerdi, atap aıtqanda, Ýkraına jáne Frantsııa elshileri Oleg Demın men Jan-Sharl Bertondy jáne Eýropalyq Komıssııa ókildiginiń basshysy Norber Jýstendi qabyldady. Qabyldaý barysynda sheteldik dıplomattar Chernobyl apatyna 25 jyl tolýy qarsańynda ústimizdegi jyldyń sáýirinde Kıev qalasynda josparlanyp otyrǵan qaýipsizdik jáne ıadrolyq energııany ınnovatsııaly paıdalaný jónindegi sammıtke qatysýǵa shaqyrǵan Prezıdent Nursultan Nazarbaevtyń atyna Ýkraına men Frantsııa prezıdentteri qol qoıǵan úndeý-hatty Qanat Saýdabaevqa resmı túrde tabys etti.
***
Prezıdent ókilettigin uzartý boıynsha referendým ótkizý bastamasy qyzý talqylanyp jatqanda, memleket basshysynyń saıası máseleler jónindegi keńesshisi Ermuhamet Ertisbaev prezıdent saılaýyn qoldaýshylar qatarynan tabylǵan bolatyn. Saıasatker «Aıqyn» gazetiniń búgingi sanynda basylymnyń birqatar saýalyna jaýap bere otyryp, jeksenbilik daýys berýden keıin qoǵamda bolatyn ózgerister jaıyn taldapty. Máselen, basylym tilshisiniń «Prezıdent saılaýynan keıin jańa Úkimet jasaqtalatyn shyǵar?» degen saýalyna ol: «Ashyǵyn aıtsam, bul taqyrypqa Memleket basshysymen sóılesken joqpyn. Men solaı bolady dep oılaımyn ári úmittenemin. Óıtkeni qoǵam belgili bir betburystar kútedi. Qalyptasqan dástúr boıynsha Prezıdentke jol ashyp, erik berý úshin eldegi barlyq atqarýshy bılik otstavkaǵa ketedi. Sondyqtan kadrlyq jańartýlar bolyp, jańa Úkimet jasaqtalady», - deıdi. Suhbat «Nazarbaev - Qazaqstannyń, halqy - Nazarbaevtyń baǵy» degen taqyryppen berilgen.
Dúısenbi kúni tal túste Almatynyń qaq ortasynda ınkassatorlarǵa qaraqshylyq shabýyl jasalyp, qyryq mln. teńge qoldy bolyp ketti. Oqıǵa ornynda bir adam qaza taýyp, ekinshisi jaraqat aldy. Osy oqıǵa arqaý bolǵan maqala «Aıqyn» gazetinde «Qyryq mıllıondy qymqyrǵandar qolǵa tústi me?» degen taqyryppen berildi. Basylymnyń atap ótýinshe, Qazir bilikti iz kesýshi mamandar bolǵan oqıǵanyń basqa jaqtaryn ashýǵa kúsh salýda. Qaraqshylardyń áketken aqshasy 275 myń dollar nemese 40 mln teńgeniń shamasynda kórinedi. Іz kesý jumystary júrip jatqandyqtan tergeý amaldaryna keri áserin tıgizbeý úshin operatsııanyń búge-shigesi aıtylmaıdy.
***
«Órkenıettiń damý joly báribir atomdy ıgerýge aparady...». «Alash aınasy» gazetiniń búgingi nómirinde osy taqyryppen jaryq kórgen maqala keshe elordada óz jumysyn bastaǵan Birinshi qazaqstandyq halyqaralyq ónerkásiptik ınnovatsııalyq forýmǵa arnalǵan. Osy jıyndy ashyp sóz sóılegen Indýstrııa jáne jańa tehnologııalar vıtse-mınıstri Dúısenbaı Turǵanov kúnshyǵys elindegi qaıǵyly apattan keıingi atom stansasyna qatysty resmı kózqarasty da qysqasha túıindeı kelip: «Biz Japonııada oryn alǵan oqıǵalardy esepke ala otyryp, atom energetıkasyn, onyń ishinde atom elektr stansalaryn salý máselesine qatysty óz qadamdarymyzdy taǵy bir márte qaıta qaraýǵa tıispiz dep oılaımyn. Onyń ishinde de negizinen atom stansalarynyń qaýipsizdigi máselesine buryndyǵan da kóp kóńil bólinýi shart», - depti.
Osy basylymnyń turaqty «Dat!» aıdarynda geografııa ǵylymynyń doktory, professor Jaqypbaı Dostaıulymen aradaǵy suhbat «Taza aýyzsýdy qala kósheleriniń shańyn basýǵa paıdalanǵanymyz qalaı?!» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Sý eseptegish ornatylǵan kúnniń ózinde bizdiń halqymyz áli kúnge tekten-tekke sýdy aǵyzyp qoıatyn ádetin qoıa almaı otyr. Basqa elderde paıdalanýyna qaraı tehnıkalyq sý men aýyzsý ekige bólingen. Al biz barlyq maqsatqa taza aýyzsýdy paıdalanyp jatyrmyz. Bul betimizben kete bersek, sýdyń zardabyn qatty tartatyn kez keledi», - deıdi.
***
«Memleket basshysy Nursultan Nazarbaev Ekonomıkalyq jáne sybaılas jemqorlyqpen kúres agenttiginiń tóraǵasy Qaırat Qojamjarovty qabyldady», - dep jazady «Kazahstanskaıa pravda» gazeti. Kezdesý barysynda Nursultan Nazarbaev jemqorlyqpen kúres - bul qarjy polıtsııasynyń negizgi mindeti ekenin atap ótti. Osy baǵyttaǵy jumysty edáýir jandandyrý qajet. Memleket basshysy Qazaqstannyń mindeti jemqorlyq deńgeıi anaǵurlym tómen memleketter qataryna ený ekenin atap ótti. Qarjy polıtsııasy agenttigi shaǵyn jáne orta bıznestiń isine aralaspaýy tıis. Osyǵan baılanysty shaǵyn jáne orta kásipkerlik sýbektileriniń quqyǵyn qorǵaý jónindegi sharany kúsheıtý qajet.
