Órkenıetti qoǵamnyń ózinde balalardy erte úılendirý faktisiniń kezdesýi nemen baılanysty eken?!
ASTANA. 19 qyrkúıek. QazAqparat - Búgin Astanada «Myńjyldyq damý maqsattarynyń aıasynda Ortalyq Azııa men Kavkaz elderindegi jasóspirim qyz balaǵa qatysty zorlyq-zombylyq pen erte jáne kúshtep qıylatyn neke qubylysyn aldyn alý» atty halyqaralyq konferentsııa óz jumysyn bastady.
Atalǵan máseleni jan-jaqty talqylaýǵa Qazaqstan, Qyrǵyzstan, Tájikstan, Ázirbaıjan, Grýzııa, Pákistan jáne Túrkimenstan elderinen depýtattar, memlekettik organdar men úkimettik emes uıymdardyń ókilderi, halyqaralyq sarapshylar keldi.
«Alaıda respýblıkada balalar men áıelder quqyǵyn qorǵaý baǵytynda eleýli sharalar atqarylyp jatsa da, ókinishke qaraı, qoǵamda jasóspirim qyz balalarǵa qatysty zorlyq-zombylyq, kúshtep erte qıylatyn nekeler sekildi faktiler oryn alýda. Bul turǵyda biz sharasyzdyq tanytpaı, osy qubylystar jaıynda ashyq aıtýymyz kerek. Osy qubylystarǵa múldem jol berilmeýi tıis», - dedi QR Parlamenti Májilisiniń depýtaty Maıra Aısına.
«Órkenıetti qoǵamnyń ózinde baıqalyp júrgen balalar nekesi faktileri nemen baılanysty eken?! Sarapshylardyń bireýleri osynyń sebebin qalyptasqan dástúrli áleýmettik-mádenı ǵuryppen balanystyrsa, ekinshileri bul qubylys kedeıshilikke, bilim deńgeıine qatysty ekenin, sondaı-aq aýyldyq jerde turǵandyqtan bolyp jatady degendi alǵa tartýda», - dep toqtaldy ol.
Osy oraıda depýtat mundaı qubylystyń saldarynan beıkúná balalar zardap shegip, olardyń jeke densaýlyǵyna zııan keletinin jáne kúshtep qıylatyn nekeden jasóspirimderdiń óz-ózine qol jumsaýy sekildi qaıǵyly oqıǵalar bolyp jatatyndyǵyn sóz etti.
«Qazaqstan zańnamasy kúshtep erte qıylatyn nekelerge tyıym salady. Sondyqtan da balalardy qorǵaý máselesine bizdiń memleket jalpyulttyq basymdyq berip otyr», - dedi M. Aısına.
