Órkenıetti el bolý úshin halqymyzdyń materıaldyq jáne rýhanı baılyǵy birdeı bolýy tıis - QR Prezıdenti
ALMATY. 9 qańtar. QazAqparat - Elimizdiń 21 jylda jetken jetistigi - birlik pen jasampazdyqtyń jáne jalpy hal-ahýal men turmystyń jaqsylyǵynyń nátıjesi.
Bul týraly QR Prezıdenti Nursultan Nazarbaev búgin Almatydaǵy rezıdentsııasynda mádenıet, ádebıet, óner jáne ǵylym qaıratkerlerine Prezıdenttik stıpendııalar men syılyqtardy tabys etý kezinde aıtty.
«Bolashaqqa qaraıtyn bolsaq, eldiń jaǵdaıy jaqsy bolý úshin bizge kıno, mýltfılm, proza, poezııa, dramalyq týyndy ne mýzykalyq shyǵarma bolsyn, qaı-qaısysy da ortaq birlikte patrıottyq pen jasampazdyqqa tárbıeleý kerek. El tizginin ustaǵanda jóndi basqara almasam maǵan sert, artymnan erip, qoldamasań halqym saǵan sert dep aıtqam. 21 jyl birge kele jatyrmyz. Qudaıǵa shúkir, saıasatta, eldi aldyǵa qaraı alyp júrýde úlken kemshilikter men qatelikter jibergenimiz joq. Osynyń barlyǵy birliktiń arqasy», - dedi Elbasy N.Nazarbaev. Memleket basshysynyń aıtýynsha, 1974 jyly Qaraǵandydan Almatyǵa qyzmetke aýysyp kelgen kezde qazaqtyń Qazaqstandaǵy aýqymy 39 paıyz bolatyn. Qazaq eli óz táýelsizdigin jarııalaǵan kezde bul 41 paıyzdy qurady. 1994 jyldan beri eldiń uıtqysy bolyp, memleket quraýshy qazaq ultynyń sany 4 mıllıonǵa ósip otyr.
